Ֆրանսիան լիբիական ընդդիմությանը համարում է "ժողովրդի օրինական ներկայացուցիչ"

Ֆրանսիան Լիբիայի անցումային ազգային խորհուրդը (ԱԱԽ) ճանաչել է որպես «լիբիացի ժողովրդի միակ օրինական ներկայացուցիչ»: Այսօր Ելիսեյան պալատում Ֆրանսիայի նախագահ Նիկոլա Սարկոզիի եւ ԱԱԽ ներկայացուցիչների հանդիպումից հետո այդ մասին լրագրողներին հայտնել է Ֆրանսիայի նախագահի մամուլի քարտուղարը:

Նա նաեւ տեղեկացրել է, որ Ֆրանսիան եւ Լիբիայի ընդդիմությունը դեսպաններ կփոխանակեն. Ֆրանսիայի դեսպանը կուղարկվի Բենգազի:

Երկյուղելով Լիբիայի հարցում եվրոպական երկրների պառակտումից` անցած գիշեր Գերմանիայի եւ Մեծ Բրիտանիայի արտգործնախարարները համատեղ նամակով կոչ են արել եվրոպական երկրներին` չհամագործակցել Քադաֆիի ռեժիմի հետ: Ֆրանսիան հավանություն է տվել այդ որոշմանը. տեղեկացնում է ԻՏԱՌ-ՏԱՍՍ-ը: