Լիբիային հեռացրել են ՄԱԿ-ի Մարդու իրավունքների խորհրդից

ՄԱԿ-ի Գլխավոր ասամբլեան երեկ դադարեցրել է Լիբիայի անդամակցությունը Մարդու իրավունքների խորհրդին: Այդ որոշմանը կողմ են քվեարկել ԳԱ բոլոր` 192 պատվիրակությունները:

Ընդունված բանաձեւի համաձայն` ՄԱԿ-ի ԳԱ-ն լրջորեն մտահոգված է Լիբիայում մարդու իրավունքների ոլորտում ստեղծված իրավիճակով:

ՄԱԿ-ի գլխավոր քարտուղար Պան Գի Մունը ողջունել է բանաձեւը, նաեւ այդ արաբական երկրում մարդու իրավունքների ոտնահարումները հետաքննող հատուկ հանձնաժողովի ստեղծման մասին որոշումը: Ընդ որում` հանձնաժողովի եզրակացություններն ուղարկվելու են Միջազգային քրեական դատարան:

«Այս գործողությունը հզոր ու կարեւոր ուղերձ է, որը մեծ հետեւանքներ կունենա տարածաշրջանում եւ դրա սահմաններից դուրս: Սա ուղերձ է այն մասին, որ անպատժելիություն գոյություն չունի, եւ մարդկության հանդեպ ոճիր գործողներն իրենց արժանի պատիժը կստանան: Բացի այդ` անխուսափելիորեն գերիշխելու են արդարադատության եւ պատասխանատվության հիմնարար սկզբունքները»,- ասել է ՄԱԿ-ի գլխավոր քարտուղարը: