Հարավային Օսիայի հավաքականն արդեն Ստեփանակերտում է

Ստեփանակերտի «Մենք ենք մեր սարերը» հուշարձանի մոտ դիմավորել են ConiFA-ի (Անկախ ֆուտբոլային ասոցիացիաների կոնֆեդերացիա) Եվրոպայի առաջնությանը մասնակից Հարավային Օսիայի հավաքականին: «Արցախպրես»-ի  թղթակցի   հաղորդմամբ՝ Հարավային Օսիայի  թիմին  ԱՀ   մշակույթի, երիտասարդության հարցերի  և  զբոսաշրջության փոխնախարար Գայանե Գրիգորյանը, ConiFA-ի առաջնությանը ներգրավված կամավորական խումբը, ֆուտբոլասերները  դիմավորել  են    աղ  ու  հացով, զուռնա  դհոլով, արցախյան  այցեքարտը  հանդիսացող ժենգյալով  հացով, գինով:Մեզ հետ զրույցում Հարավային Օսիայի սպորտի նախարար Սերգեյ Զասեևն  ասել է, որ առաջին անգամ է Արցախում և հուսով է, որ այցելությունները շարունակական բնույթ կկրեն:«Շատ է ուրախացնում այն փաստը, որ այսպիսի կարևոր ֆուտբոլային միջոցառումն անցկացվում է Արցախում: Մեր հավաքականը 2013 թվականից ConiFA-ի անդամ է և առաջին անգամ մասնակցություն է ունեցել  խաղերին Շվեդիայում: Այնտեղ մենք  անցանք կիսաեզրափակիչ և գրավեցինք 4-րդ տեղ: Հուսով ենք, որ այս երկիրը մեզ հաջողություն կբերի և արցախցի ֆուտբոլասերները, իրենց թիմից բացի, կերկրպագեն նաև մեզ»,- ասել է նա:Հավաքականի  գլխավոր մրցավար Սուսլան Կոչևն  ևս   առաջին  անգամ է   Արցախում և վստահ է , որ կցուցադրեն  տպավորիչ խաղ՝ հաճույք պարգևելով ֆուտբոլասեր հանրությանը: Նա առաջնության մասնակիցներին մաղթել է  արդար մրցակցություն և դրական զգացողություններ: