Միջազգային 3 կազմակերպություն քննադատել է Բաքվին

Միջազգային 3 կազմակերպություն քննադատել է Բաքվին լրագրող Սևինջ Օսմանգըզըի նկատմամբ հետապնդման և սպառնալիքների համար. հաղորդում է «Թուրան» գործակալությունը:

Freedom House-ի հայտարարության մեջ նշվում է. «Ստիպել կին լրագրողին` դադարեցնել քննադատական ռեպորտաժները անձնական, ինտիմ լուսանկար տարածելու սպառնալիքով` համարվում է մարդու անձնական կյանքի անձեռնամխելիության, արժանապատվության և մտքերի ազատ արտահայտման կոպտագույն խախտում: Կառավարությունը պետք է անմիջապես դադարեցնի այդ պրակտիկան: Կին լրագրողները պետք է ունենան Ադրբեջանում առանց շանտաժի վտանգի աշխատելու հնարավորություն»,- նշել է  Freedom House-ի Եվրոպայի և Ասիայի ծրագրերի ղեկավար Մարկ Բերենդտը:

Լրագրողների պաշտպանության միջազգային կոմիտեն (CPJ) էլ, իր հերթին, պահանջել է իշխանությունից` հետաքննություն սկսել Սևինջ Օսմանգըզըի շանտաժի և հետապնդման վերաբերյալ, որն ուղղորդվում է իշխանամետ Real TV-ի կողմից: Այդ հեռուստաընկերությունը անհայտ աղբյուրներից ստացել է լրագրողի անձնական նամակագրության տվյալները: Ապրիլի 21-ին հեռուստաընկերության հաղորդավարը սպառնացել էր ուղիղ եթերում հրապարակել ինտիմ լուսանկարները, եթե լրագրողը չդադարեցնի իր օնլայն հաղորդումը և ներողություն չխնդրի:

«Լրագրողին լռեցնելու այս զզվելի փորձերը պետք է անմիջապես դադարեցվեն: Ադրբեջանի իշխանությունները պետք է հետաքննեն հանրային սպառնալիքներն ու հետապնդումները և պատասխանատվության ենթարկեն մեղավորներին»,- նշել է CPJ-ի Եվրոպայի և Կենտրոնական Ասիայի համակարգող Գուլնոզա Սաիդը:

Сrude Accountability խոսքի արտահայտման պաշտպանության կազմակերպությունը ևս դատապարտել է այս դեպքը և կոչ արել ԱՄՆ-ին և արևմտյան այլ երկրների` պատժել Ադրբեջանի իշխանություններին:

Նախքան այս դեպքը` Օսմանգըզըն հաղորդումների շարք էր թողարկել, որում քննադատում էր երկրի նավթային սեկտորում կոռուպցիայի դեպքերըլ, ինչից հետո նրա նկատմամբ սկսվեց մեղադրական արշավ: Сrude Accountability-ն նշում է, որ հետապնդումների հրամանը եկել է իշխանական շրջանակների կողմից:

Նշենք, որ իշխանությունները նմանատիպ մեթոդներ կիրառել էին նաև Խադիջա Իսմայլովայի նկատմամբ, որին շանտաժի էին ենթարկում սեքս-վիդեոյի միջոցով, որը նկարվել էր թաքնված տեսախցիկով: Նպատակը իշխանության վերին շրջանակներում կոռուպցիոն հետաքննության դադարեցումն էր: