ՀԱՊԿ-ի ուժերը կարելի է օգտագործել ՇՀԿ-ում և ԱՊՀ-ում ճգնաժամերը լուծելու նպատակով. Սեյտիմով

ՀԱՊԿ արագ արձագանքման ուժերը կարելի է օգտագործել ԱՊՀ-ի և ՇՀԿ-ի տարածքում ճգնաժամային իրավիճակների լուծման գործում։ Նման կարծիք հայտնել է ԱՊՀ գլխավոր քարտուղարի տեղակալ Նուրլան Սեյտիմովը:

Ելույթ ունենալով Եվրասիական անվտանգության հարցերով Մինսկի 3-րդ միջազգային խորհրդաժողովում՝ պաշտոնյան հայտարարել է, որ ԱՊՀ-ի, ՇՀԿ-ի և ՀԱՊԿ-ի անդամ երկրների ռազմական նշանակության համակարգերը համադրման ներուժ ունեն:

Սեյտիմովի խոսքով՝ այդ գործընթացը հնարավոր է համատեղ պլանավորման, զորավարժությունների ժամանակացույցի ներդաշնակեցման և, ըստ անհրաժեշտության՝ ՀԱՊԿ արագ արձագանքման ստորաբաժանումների ինտեգրման շրջանակներում ԱՊՀ և ՇՀԿ ճգնաժամային սցենարներում:

«Խոսքը ոչ միայն համատեղ զորավարժությունների անցկացման, այլև միասնական շտաբի հնարավոր ձևավորման մասին է, որը կարող է իրական ժամանակի ռեժիմում համակարգել կազմակերպությունների մասնակից պետությունների զինված ուժերի և հատուկ ծառայությունների գործողությունները սպառնալիքների առաջացման դեպքում», - հավելել է Սեյտիմովը:

Նրա խոսքով՝ իրար հետ սերտ կապ ունեցող աշխարհաքաղաքական մարտահրավերները դուրս են գալիս առանձին պետությունների և դաշինքների սահմաններից և ազդեցության ոլորտներից, ինչը պահանջում է միջազգային հարաբերությունների տարբեր սուբյեկտների ջանքերի միավորում: