Սա Թուրքիայի երկրորդ ներխուժումն է Կիպրոս. Կիպրոսի նախագահ

Կիպրոսի նախագահ Նիկոս Անաստասիադիսը բացառիկ տնտեսական գոտում Թուրքիայի գործողությունները որակել է որպես երկրորդ ներխուժում. հայտնում է կիպրոսյան cyprus-mail.com կայքը:

Երեկ Կիպրոսի իշխանությունները դիմել են միջազգային ատյաններին` թուրքական «Ֆաթիհ» («Նվաճող») հորատող նավի անձնակազմին ձերբակալելու պահանջով: Թուրքիան հորատման աշխատանքներն իրականացնում է Կիպրոսի խոշոր նավահանգիստներից մեկից` Պաֆոսից 60 կմ հեռու: Անաստասիադիսը հայտարարել է, որ Անկարայի գործողություններն անհնարին են դարձրել կղզու վերամիավորման վերաբերյալ բանակցությունների վերսկսումը:

Նշենք, որ «Ֆաթիհ» նավը Կիպրոսի ջրերում է մայիսի 4-ի առավոտից: Թուրքիան հայտարարել է, որ գազի և նավթի հորատման աշխատանքները կավարտվեն սեպտեմբերի 3-ին:

«Սա միջազգային իրավունքի ակնհայտ խախտում է, կամ` կարող եմ ասել` երկրորդ ներխուժումն է: Ոչ ոք չի կարող խոսել խաղաղության մասին` գտնվելով սպառնալիքի տակ: Սա միայն սպառնալիք չէ, այլ արդեն միջազգային իրավունքի կոպտագույն որերորդ խախտումը»,– նշել է Անաստասիադիսը:

Թուրքիայի նախագահ Ռեջեփ Թայիփ Էրդողանն իր հերթին արձագանքել է այս լարված իրադարձություններին: «Թուրքիայի և թուրք կիպրոսցիների օրինական իրավունքները Միջերկրական ծովի արևմտյան հատվածում էներգետիկ ռեսուրսների հարցում քննարկման ենթակա չեն: Մեր երկիրը լի է վճռականությամբ` պաշտպանել իր և թուրք կիպրոսցիների իրավունքները: Մենք ակնկալում ենք, որ ՆԱՏՕ-ն կհարգի մեր իրավունքներն ու կաջակցի մեզ»,- ասել է նա:

Թուրքիայի քննադատությամբ են հանդես եկել ԵՄ-ն, Ռուսաստանը, Հունաստանը, Մեծ Բրիտանիան, ԱՄՆ-ն: Թուրքիան, ի պատասխան ԱՄՆ-ի քննադատություններին, դրանք որակել է «իրականությունից կտրված»: