Արցախում գարնանացան մշակաբույսերի ցանքատարածքներն այս տարի ավելացել են 20 %-ով

Այս  մասին  «Արցախպրես»-ի  թղթակցի   հետ  զրույցում   ասել է ԱՀ  գյուղատնտեսության   փոխնախարար Վիլեն  Ավետիսյանը՝   ընդգծելով, որ  նախորդ տարվա նույն ժամանակահատվածի համեմատ գարնանացան մշակաբույսերի ցանքատարածքներն  ավել են շուրջ 20 %-ով:

 

«Ներկայումս  55 000 հա-ի վրա կատարվել են հիվանդությունների ու վնասատուների դեմ պայքարի միջոցառումներ, 3000 հա-ի վրա մոլախոտերի դեմ պայքարի աշխատանքներ, շուրջ 10 հազար հա-ի վրա՝ պարարտացման և ընդհանուր սնուցման և 5000 հա-ի վրա` ոռոգման: Այդուամենայնիվ,  արձանագրված դրական ցուցանիշների հետ մեկտեղ կան նաև մի շարք բացասական երևույթներ, որոնք դանդաղեցնում և դժվարացնում են գարնանացանի գործնթացը: Մասնավորապես, շրջանային գյուղբաժինների կողմից պարբերաբար անվանական ցանկերում փոփոխություններ են կատարվում, որոնք  իրենց  հերթին բավականին լուրջ խնդիրներ են առաջացնում «Բուսաբուծության համալիր զարգացման ծրագրի»  շրջանակներում սերմերի ձեռքբերման և տրամադրման գործնթացում: Դրա հիմնական պատճառն  այն է, որ հողօգտագործողների զգալի մասը նախապես կողմնորոշված չէ, թե ինչ մշակաբույս է ընտրելու և որտեղ է այն ցանելու: Այդ իսկ պատճառով յուրաքանչյուր հողօգտագործող պետք է ժամանակին տեղեկացված լինի տնտեսական տարում ոլորտում նախատեսվող ծրագրերին և առաջարկվող պետական աջակցություններին»,-մասնավորապես  ասել  է   Վ. Ավետիսյանը: