Էրտողան Երկու Անգամ Մերժած Է Փութինի` Ուքրանիոյ Եկեղեցւոյ Եւ Պոլսոյ Յոյն Ուղղափառ Պատրիարքարանի Գործողութիւններուն Միջամտելու Դիմումը

Ըստ «Ճումհուրիեթ»-ի. Էրտողան Երկու Անգամ Մերժած Է Փութինի` Ուքրանիոյ Եկեղեցւոյ Եւ Պոլսոյ Յոյն Ուղղափառ Պատրիարքարանի Գործողութիւններուն Միջամտելու Դիմումը

Թուրքիոյ նախագահ Ռեճեփ Թայիփ Էրտողան երկու անգամ մերժած է Ռուսիոյ նախագահ Վլատիմիր Փութինի` Ուքրանիոյ եկեղեցւոյ եւ Պոլսոյ յոյն ուղղափառ եկեղեցւոյ գործողութիւններուն միջամտելու դիմումը: Այս մասին յայտնած է պատրիարքութեան` Պուրսայի առաջնորդ Էլֆիտոֆորոս Լամպրինիատիսը թրքական «Ճումհուրիեթ» օրաթերթին հետ հարցազրոյցի ընթացքին:

Յոյն բարձրաստիճան հոգեւորականը նշած է, թէ հակառակ Անգարայի եւ Մոսկուայի սերտ յարաբերութիւններուն` Թուրքիոյ ղեկավարը մերժած է միջամտել ուղղափառ եկեղեցւոյ գործերուն` շեշտելով, որ Թուրքիան աշխարհիկ պետութիւն է, եւ իշխանութիւնները չեն խառնուիր եկեղեցական ներքին հարցերուն:

Լամպրինիատիս նշած է, թէ Փութին Ուքրանիոյ եկեղեցւոյ առնչուած խնդիրներուն Էրտողանի միջամտութիւնը ակնկալած է երկու անգամ` 2008-ին եւ 2018-ին: Էրտողան երկու անգամ ալ բացասական պատասխան տուած է Ռուսիոյ նախագահին:

Յիշեցնենք, որ անցեալ տարուընէ Ուքրանիան Պոլսոյ պատրիարքութենէն անկախացման մասին հրամանագիր խնդրած է: Յունուար 2019-ի սկիզբը Պոլսոյ յոյն ուղղափառ Բարթողիմէոս պատրիարքը Քիեւին փոխանցած է «նոր եկեղեցւոյ» անկախացման մասին հրամանագիրը:

Պոլսոյ պատրիարքութեան կողմէ այդ քայլին պատճառով Ռուսիոյ ուղղափառ եկեղեցին յայտարարած էր Պոլսոյ պատրիարքութեան հետ հաղորդակցութեան դադրեցման մասին:

Ազդակ օրաթերթ