«Իմ քայլը» անունով բարեգործական հիմնադրամի ստեղծումը կոռուպցիայի դասական դրսևորում է, կլասիկ կոռուպցիոներներ են. Զարուհի Փոստանջյան

Մեր երկրում ոչինչ չի փոխվել, ընդամենը տեղի է ունեցել տեղափոխություն: Իսկ երկրորդ ուժը շարունակում է մնալ ԲՀԿ-ն, այսինքն՝ ՀՀԿ-ին փոխարինել է ՔՊ-ն: Այս մասին լրագրողների հետ զրույցում ասաց «Երկիր ծիրանի» կուսակցության նախագահ Զարուհի Փոստանջյանը:

Ըստ նրա՝ Հայաստանը իրավական պետություն չէ, ավելին` խորհրդարանում առկա քաղաքական պատկերը ցույց է տալիս, որ ՀՀ-ում չկա բազմակարծություն:

«Եվ եթե ԱԺ-ն իրապես ներկայացնում է մեր ազգի շահերը, ապա այն  պետք է ներկայացնի բոլոր շերտերի կարծիքները, մինչդեռ` տեղի չունեցան այն բարեփոխումները, ինչը կտաներ դրան: Հինգ տոկոսանոց շեմը և ռեյտինգային համակարգը հանգեցրին նրան, որ ՀՀԿ-ն փոխակերպվեց ՔՊ-ով: Էությունը չի փոխվել, ուստի միատեսակ քվեարկություններ են լինելու, ինչի ականատեսը եղանք: Այն, որ Արարատ Միրզոյանն, առանց դեմերի ու ձեռնպահների, 131 ձայնով ընտրվեց, վտանգավոր ցուցիչ է և խոսում է այն մասին, որ ՀՀ-ում չկա բազմակարծություն, մինչդեռ` խորհրդարանը պետք է դառնա բազմակարծության կենտրոն: Եթե դու հագնում ես բռնապետի նույն վերարկուն, դա արդեն անդրադառնում է քեզ վրա: Հիմա այդ բռնապետի վերարկուն հագել են այս քաղաքական ուժերը, որոնց առաջին իսկ քվեարկությունը ցույց տվեց, որ, նախ, չկա ընդդիմություն»,- նշեց նա:

Անդրադառնալով փաստաբանների նկատմամբ վերաբերմունքին և սպառնալիքներին՝ Զարուհի Փոստանջյանը շեշտեց, որ գործադիրը պետք է քաղաքականություն վարի և հստակ ցույց տա, որ հարգում է մարդու իրավունքները, քանի որ փաստաբանի նկատմամբ ոտնձգությունն արդարադատության դեմ ոտնձգություն է:

«Պետության ներկայացուցիչները՝ ի դեմս  ոստիկանության, ցուցաբերել են անգործություն: Եվ այս անգործությունը պիտի դատապարտվի: Պետք է հասկանանք, որ ցանկացած մարդ ունի պաշտպանվելու իրավունք՝ անկախ նրանից, թե որ ուժին է պատկանում, ինչի մեջ է մեղադրվում: Այս մարդիկ ունեն պաշտպան ունենալու, իրավաբանական և բժշկական օգնություն ստանալու իրավունք: Մենք հարգում ենք, որ կա հանրություն, որն ուզում է իր բողոքն արտահայտել, բայց նույն հանրությունը պիտի հասկանա, որ 9 ամսվա ընթացքում այս կառավարությունը, որի կողմից նշանակվել են ԱԱԾ, ՀՔԾ ղեկավարները, եթե արդար է և ցանկանում է բացահայտել հանցագործությունները, ապա արդեն մեղադրական եզրակացություններ պիտի լինեին այս գործերով դատարանում: Հանրությունը պիտի հասկանա՝ սա բեմադրություն է և իրեն օգտագործում են այդ բեմադրության մեջ՝ բռնել և հետո բաց թողնել, շահարկել», -նշեց Փոստանջյանը՝ շեշտելով, որ նախնական կալանքն ազատազրկման ձևով պատիժը չէ:

Ինչ վերաբերում է կոռուպցիայի դեմ պայքարին՝ Փոստանջյանը շեշտեց, որ կոռուպցիայի դեմ պայքարի մասին հայտարարություններն ուղղակիորեն հակասում են փաստին, որ «Իմ քայլը» անունով բարեգործական հիմնադրամ է ստեղծվում:

«Սա կոռուպցիայի դասական դրսևորում է: Կլասիկ կոռուպցիոներներ են այս մարդիկ»,- ասաց նա՝ ընդգծելով, որ կոռուպցիայի վկայություն են նաև Նիկոլ Փաշինյանի, ՀՔԾ-ի ու ԱԱԾ-ի ղեկավարների հեռախոսային խոսակցությունները: