Բանավեճն իմ սրտով չստացվեց, ամեն մեկն ուզեցավ մեկը մյուսի հաշվին դիվիդենդներ շահի. Ծառուկյան

Բանավեճը Գագիկ Ծառուկյանի սրտով չստացվեց: Այսօր Գյումրիում լրագրողներին այդ մասին հայտնեց ինքը` «Բարգավաճ Հայաստան» կուսակցության նախագահը՝ նշելով, որ քաղաքական ուժերի նախընտրական ցուցակները գլխավորողները պիտի ծրագրերից խոսեին:

«Ամբողջ աշխարհի հայությունը, ՀՀ-ի ժողովուրդը սպասում էր, որ յուրաքանչյուր կուսակցության ղեկավար պետք է իր տեսակետն ու մոտեցումը հայտներ, իր ծրագիրը կետ առ կետ, ոչ թե գեղեցիկ խոսքեր ասեր, որ ծաղկացնելու ա, այլ պիտի ասեր, թե որ ոլորտն ինչ սկզբունքով և ոնց է անելու… Այսօր գիտենք մեր տնտեսական և ֆինանսական վիճակը, պետք է ամեն մեկին հնարավորություն տրվեր, որ ասեին՝ գյուղատնտեսության հարցը ոնց ա լինելու,  ոնց ենք զարգացնելու, ինչի հիման վրա, ինչ գումարներով, կամ ասենք թե` ուսանողների, թոշակների, աշխատողների, ներդրման  հետ կապված: Այնտեղ ոնց որ թե ամեն մեկն ուզեցավ մեկը մյուսի հաշվին դիվիդենդներ շահի: Դա է իմ ասածը, ես պատկերացնում էի, որ ամեն մեկը պիտի ասեր, թե ոնց պետք է անի տվյալ ոլորտի զարգացումը: Թե չէ բոլորն էլ ասում են՝  լավ ա լինելու, ծաղկացնում են, ո՞նց, երբ միլիարդներ չունենք,  6-7 միլիարդ պարտք ունենք, պատերազմող երկիր ենք: Այս սկզբունքը պետք է լիներ, թե ոնց պիտի արվի: Առաջին անգամ էր, նորմալ էր, բայց  կրկնում՝ այնքան էլ իմ սրտով չէր»,- նշեց Ծառուկյանը: