Հակառակորդի գնդակից զոհվածներից մեկը տնակում է եղել, մյուսի մահվան պատճառը բեկորներն են

Այս պահին Տավուշի մարզի սահմանամերձ Բերդավան գյուղում իրավիճակը համեմատաբար հանգիստ է. հակառակորդը լռել է: Այս մասին Yerkir.am-ի հետ զրույցում հայտնեց Բերդավանի գյուղապետ Արարատ Գաբրիելյանը: Նա նաեւ տեղեկություններ հաղորդեց գյուղի երկու զոհերի եւ երկու վիրավորների մասին:

Նախ նշենք, որ վիրավորների կյանքին վտանգ չի սպառնում: Բերդավանում զոհված երկու կանանցից մեկը տարեց կին է, մյուսը՝ միջին տարիքի: Նրանցից մեկը մահացել է հենց տնակում, մյուսի տան պատն են գնդակոծել, բեկորներն էլ դարձել են կնոջ մահվան պատճառ: Գյուղապետը նաեւ տեղեկացրեց, որ զոհերը եւ վիրավորները տարբեր տների բնակիչներ են եղել. վիրավորներից մեկը զոհված տարեց կնոջ թոռն է: