«Ադրբեջանն իր խավիարային դիվանագիտությամբ ու նավթադոլարներով է փորձում դիվիդենդներ շահել»

Խորհրդարանական ճեպազրույցի ընթացքում ԲՀԿ մամուլի խոսնակ Վահան Բաբայանն անդրադարձավ ԵԽԽՎ հանձնաժողովի այն ձևակերպմանը, համաձայն որի` «Լեռնային Ղարաբաղն օկուպացվել է Հայաստանի կողմից»: Նա նշեց, որ երկու օր առաջ հանդիպել է ԵԽԽՎ պատվիրակության անդամ Նաիրա Զոհրաբյանի և համազեկուցողների հետ:

Ըստ Բաբայանի` ԵԽԽՎ հայաստանյան պատվիրակության բոլոր ներկայացուցիչներն անելու են ամեն ինչ, որ ՀՀ շահերը պաշտպանված լինեն: Իսկ բոլոր քննադատներին խորհուրդ տվեց ամպագոռգոռ հայտարարությւոններ անելուց առաջ որոշ քայլեր ձեռնարկել` հօգուտ ՀՀ-ի և ԼՂՀ-ի:

«Ադրբեջանն իր խավիարային դիվանագիտությամբ ու նավթադոլարներով է փորձում դիվիդենդներ շահել, ինչին հայկական կողմն ուշադիր հետևում է և փորձում կանխել»,- ասաց Բաբայանը:

Հարցին, թե հայկական կողմն ի՞նչ ունի խավիարին, նավթադոլարներին համարժեք, նա պատասխանեց` ՀՀ-ն հզոր է իր Սփյուռքով, մտավոր կարողությամբ, և դրա մասին է վկայում ԼՂՀ հաղթանակը: