Մոսկովյան 5-ում կունենանք ոչ միայն մնջախաղի թատրոն, այլև մնջախաղի կենտրոն. Լիլիթ Մակունց

Մնջախաղի թատրոնի համար նոր տարածքի փնտրտուքները մի փոքր ավելի երկար տևեցին. լրագրողների հետ զրույցում ասաց ՀՀ մշակույթի նախարարի պաշտոնակատար Լիլիթ Մակունցը` անդրադառնալով Մնջախաղի թատրոնի շենքի խնդրին:

Հիշեցնենք, որ Մնջախաղի թատրոնի` 43 տարվա անհասցե դեգերումներից հետո հիմնական հասցե ու շենք ունենալու ուրախությունը կարծես երկար չտևեց. պարզվեց, որ թատրոնին Գևորգ Քոչար 21 հասցեում տրված շենքի, որը հուշարձան է,  որևէ փոփոխություն անթույլատրելի է:

Մակունցը նշեց, որ թատրոնի տնօրեն Ժիրայր Դադասյանի հետ պայմանավորվել են, որ նրանց նոր տարածք հատկացվի: «Գիտեք` փոքր կենտրոնում ազատ տարածքներ գրեթե չկան: Սակայն այս պահին պաշտպանության նախարարության ենթակայության տակ գտնվող կառույցներից մեկը, որը լուծարման ընթացքում է, պետք է փոխանցվի պետգույքին: Այդ տարածքի հետ կապված պետգույքի պետի` Նարեկ Բաբայանի հետ արդեն իսկ խորհրդակցել ու որոշել ենք, որ այդտեղ կարող ենք ունենալ ոչ միայն մնջախաղի թատրոն, այլև մնջախաղի ուսումնական կենտրոն»,- ասաց Մակունցը:

Նրա խոսքով` տարածքը բավականին մեծ է, և Դադասյանի հետ դեռ պետք է քննարկեն հարցը, որպեսզի այնտեղ այլ ստեղծագործական խմբեր նույնպես աշխատեն: Խնդրի լուծման ընթացքը, ըստ Մակունցի, տրված է, մնացածը ժամանակի հարց է:

Նշենք, որ թատրոնի համար առաջարկվող շենքը գտնվում է Մոսկովյան 5 հասցեում (Ղուկաս Ղուկասյանի անվան պիոներների և դպրոցականների պալատի բակային մասում): Հուսանք, որ այս անգամ թատրոնի շենքի խնդրին վերջնական լուծում կտրվի, և, ի վերջո, թատրոնը կունենա մշտական հասցե և իր ժամանակը կվատնի ներկայացումների բեմադրման, ոչ թե տարածքի համար պայքարի վրա: