Պետք է հավասարակշռված մոտեցում լինի. Ջանջուղազյանը՝ կենսաթոշակայինի պարտադիր բաղադրիչի հետաձգման մասին

Ֆինանսների նախարար Ատոմ Ջանջուղազյանի կարծիքով` վարքագիծը բոլոր գործընկերների ու ներդրողների համար պետք է հստակ լինի, հակառակ դեպքում` ներդրումներ չեն լինի: Այս մասին նա հայտարարեց ԱԺ-ում լրագրողների հետ զրույցում:

«Այս տեսակետից մենք պետք է բավականին հավասարակշռված լինենք»,- ասաց նախարարը՝ խոսելով աշխատանքի և սոցիալական հարցերի նախարար Մանե Թանդիլյանի առաջարկի մասին՝ 1 տարով հետաձգել կուտակային կենսաթոշակային համակարգի պարտադիր բաղադրիչը:

Նախարարը հստակեցրեց՝ չի ասում, որ դեմ է այդ որոշմանը կամ դեմ է պարտադիրին` ընդհանրապես, այլ ասում է, որ հավասարակշռված մոտեցում լինի:

Ինչ վերաբերում է բյուջեին, ապա նախարարն ասաց, որ դեռ ճշտումներ են լինելու: 

Իսկ ստվերի կրճատման հետ կապված հարցին, թե ինքը նախկինում իմացե՞լ է տեղը, Ջանջուղազյանն արձագանքեց. «Ես կաշկանդված չեմ որևէ բանով: Եթե ես իմանայի ստվերի չափն` ի պաշտոնե, դա կնշանակեր, որ պետք է իմանայի նաև ստվերի տեղը, իսկ եթե իմանայի ու քայլեր չձեռնարկեի, պիտի դադարեի պաշտոնյա լինելուց: Դրսում եղած մասի չափը, տեղը ես չգիտեմ, այնպես որ` պատճառը, որ ասում եմ՝ չգիտեմ, այն չէ, որ պաշտոնյա եմ»: