Հիմա մենք ընդդիմադիր գործիչ Նիկոլ Փաշինյանի՞, թե՞ վարչապետի թեկնածու Փաշինյանի ասածը հիմք ընդունենք. Շարմազանով

ԱԺ փոխնախագահ, ՀՀԿ խմբակցության պատգամավոր Էդուարդ Շարմազանովն ԱԺ-ում «Ելք» խմբակցության կողմից վարչապետի թեկնածու առաջադրված Նիկոլ Փաշինյանին հիշեցրեց նրա` ԵԱՏՄ-ից դուրս գալու վերաբերյալ նախկինում արված հայտարարությունները:

«Վերջին օրերի ընթացքում Դուք նշել եք, որ Ձեր` վարչապետ ընտրվելու պարագայում Հայաստանը դուրս չի գա ԵԱՏՄ-ից: Հիմա մենք Նիկոլ Փաշինյանի ո՞ր ասածը հիմք ընդունենք, այն, որ ընդդիմադիր գործիչ Նիկոլ Փաշինյանն ասում էր, որ Հայաստանը ԵԱՏՄ-ից պետք է դուրս գա՞, թե վարչապետի թեկնածու Փաշինյանինին, ով ասում է` ԵԱՏՄ-ից չպետք է դուրս գա»,- հարցրեց Շարմազանովը:

ՀՀԿ-ական պատգամավորը նաև հետաքրքրվեց` հնարավո՞ր է Փաշինյանի` վարչապետ ընտրվելու պարագայում նրա գործունեությունն ու քայլերը ևս 180 աստիճանով տարբերվեն «Ելք» խմբակցության ղեկավար Նիկոլ Փաշինյանի քաղաքական հայտարարություններից:

«Գաղտնիք չէ, որ ես դեմ եմ քվեարկել ԵԱՏՄ-ին Հայաստանի անդամակցությանը, ինչը նշանակում է, որ ես դեմ եմ եղել Հայաստանի անդամակցությանը ԵԱՏՄ-ին: Բայց, այնուամենայնիվ, Հայաստանը ԵԱՏՄ անդամ է, և մենք, լինելով քաղաքական ու պետական գործիչներ, պետք է հաշվի նստենք իրողությունների և փաստերի հետ: Կարծում եմ` ցանկացած պետական գործիչ, ով ելնում է Հայաստանի շահերից, պետք է այդպես էլ վարվի»,- պատասխանեց Փաշինյանը` հիշեցնելով, որ ինքը նախկինում էլ է ասել, որ դեմ է քվեարկել` պատճառաբանելով, որ արտաքին քաղաքականության մեջ կտրուկ շրջադարձերը շատ վտանգավոր կարող են լինել երկրի համար:

«Ես կարծում եմ, որ պետական գործիչները և իշխանություններն` ընդհանրապես, պետք է առաջնորդվեն ոչ թե իրենց քմահաճույքներով, այլ երկրի ազգային շահերով և ձեռնարկեն գործողություններ, որոնք բխում են երկրի ազգային շահերից: Երբ դու ընդդիմության ներկայացուցիչ ես, դու չես կարող այն պրոբլեմները, որոնք կապված են ԵԱՏՄ-ի հետ, քննարկել գործընկերների հետ և տվյալ դեպքում փնտրում ես գործիքակազմ, որպեսզի այդ հարցերը հնարավորինս լսելի դարձնես և բարձրաձայնես: Սակայն երբ դու իշխանություն ես, կարող ես այդ հարցերն ըստ առաջնահերթության դասավորել և համբերատար քննարկել գործընկերների հետ: Ընդհանուր առմամբ, այո, Հայաստանը վարչապետ ընտրելու պարագայում ԵԱՏՄ-ին անդամակցությունը դադարեցնելու հարց չի բարձրացնելու, սակայն սա չի նշանակում, որ ես ասում եմ` ԵԱՏՄ-ում ամեն ինչ իդեալական է: Ոչ, կան խնդիրներ, և մենք կշարունակենք բոլոր այդ խնդիրները քննարկել և հասնել լուծումների»,- ասաց նա:

Շարմազանովը հակադարձեց Փաշինյանին` նշելով, որ, այնուամենայնիվ, նա իրեն չհամոզեց: «Ես այն կարծիքին չեմ, որ ընդդիմության անդամի խոսքը պակաս կարևոր է, քան իշխանության: Դուք այսօր շատ լավ ապացուցեցիք, որ Հայաստանի արտաքին քաղաքականությունը բխում է Հայաստանի շահերից, և ԵԱՏՄ-ն սպասարկել է Հայաստանի Հանրապետության պետական շահը, որի համար Ձեզ շատ շնորհակալ եմ»,- ասաց նա:

Փաշինյանն էլ իր հերթին հայտարարեց, որ ինքն ընդամենը արձանագրել է, որ պետական ու քաղաքական գործիչները պարտավոր են հաշվի նստել իրողությունների հետ: