Փաշինյանը հարթակից հնչեցրեց ճգնաժամի լուծման միակ ճանապարհը

Այսօր Նիկոլ Փաշինյանը ավտոերթով մեկնել է Գյումրի, որտեղ կազմակերպվել է հանրահավաք: Իր ելույթում Նիկոլ Փաշինյանը նշեց, որ ոմանք փորձում են պարզեցնել ստեղծված վիճակը, ասելով, որ վարչապետի պաշտոնի համար է ամբողջը, սակայն, նրա խոսքով, ժողովրդի հաղթանակը ամրագրելու միակ ուղին ժողովրդի թեկնածուին վարչապետ ընտրելն է, և ուրիշ ճանապարհ չկա:

«Կարեն Կարապետյան, եթե դու ուզում ես ունենալ հաղթանակած ժողովրդին որպես թշնամի, ուրեմն քեզ սպասում է Սերժ Սարգսյանի ճակատագիրը»,- ասաց Փաշինյանը հավելելով, որ Կարեն Կարապետյանը Սամվել Կարապետյանի հետ խաղում են ժամանակի վրա:

Ըստ Փաշինյանի, ճգնաժամի լուծումն այն է, որ ԱԺ բոլոր խմբակցությունները` ներառյալ ՀՀԿ-ն, ՀՅԴ-ն, Ծառուկյան ու Ելք խմբակցությունները, վարչապետի թեկնածու առաջադրեն ժողովրդի թեկնածուին ու մայիսի 1-ին ընտրեն նրան:

«Սա այս իրավիճակի լուծման միակ ճանապարհն է: Մնացած բոլոր լուծումները էլ ավելի են խորացնելու ճգնաժամը»,- ասաց նա:

Վերջում նա տեղեկացրեց, որ ապրիլի 29-ից անհնազանդության գործողությունները, երթերը  և հանրահավաքները վերսկսվելու են կրկնակի թափով, իսկ մայիսի 1-ին մարդիկ պետք է հեղեղեն Երևանի բոլոր փողոցները:Հանրահավաքն ավարտվեց երթով: