«Ծառուկյան» խմբակցությունը կքվեարկի ազատ՝ իր խղճի մտոք. Նաիրա Զոհրաբյան

ԱԺ «Ծառուկյան» խմբակցությունն այսօր Սերժ Սարգսյանին վարչապետ ընտրելու հարցում ազատ կլինի։ Այս մասին լրագրողներին ասաց խմբակցության պատգամավոր Նաիրա Զոհրաբյանը:

«Խմբակցությունը թողնված է ազատ քվեարկության, կքվեարկեն` յուրաքանչյուրն իր խղճի մտոք»,- ասաց նա` հավելելով, որ ինքն անձամբ դեմ է քվեարկելու։

Զոհրաբյանը նշեց, որ քվեարկությունը կլինի բաց, և կտեսնեն, թե յուրաքանչյուր պատգամավոր ինչպես է քվեարկում: Ըստ նրա` նիստին հանգիստ է եկել. ոստիկանները բացել են ճանապարհը, և ինքն անցել է:

Պատգամավորն անհեթեթություն համարեց այն դիտարկումը, որ պատգամավորները գիշերել են Ազգային ժողովում:

Ինչ վերաբերում է ընդդիմության գործողություններին, ապա Զոհրաբյանը նշեց, որ ցանկացած քաղաքական ուժ իրավունք ունի այս կամ այն գործողություններ անելու:

«Հակաօրինական գործողություններ մինչ այս պահը չեմ տեսել: Եթե ՀՀԿ-ն ունի քաղաքական որոշում, եթե մենք ժողովրդավարական երկիր ենք, և կան ուժեր, համաձայն չլինելով այս կամ այն որոշման հետ, Սահմանադրությամբ բացառապես թույլատրված միջոցներով կարող են դեմ արտահայտվել»,- ասաց նա: