«Թզբեհը գցեցին դեմս, ասացին՝ սովորի, որ գաղութում գցես». աղմկոտ սպանության գործով ցուցմունք տվեց կին վկան

2016 թվականի նոյեմբերի 13-ին Չարբախում տեղի ունեցած` երկու անձի աղմկահարույց սպանության գործով այսօրվա դատական նիստում ցուցմունք տվեց գործով վկա Վարդիկ Մկրտչյանը: Նա հայտնեց, որ որպես հավաքարար է աշխատում Չարբախում գործող «Լիա» գեղեցկության սրահում:

Հիշեցնենք, որ աղմկոտ սպանությունը տեղի է ունեցել «Լիա» գեղեցկության սրահին կից նկուղում:

Վկան իր ցուցմունքում հայտնեց, որ դեպքից առաջ փորձաշրջան է անցել գեղեցկության սրահի տնօրենի՝ Անժելայի (խմբ. գործով ամբաստանյալ Պետրոս Իսրայելյանի կինը) մոտ, այնուհետև ընդունվել աշխատանքի: Նա հայտնեց, որ երեք շաբաթ փորձաշրջանի մեջ էր, երբ դեպքը պատահել է: Նշենք սակայն, որ նախաքննական ցուցմունքում վկան հայտնել էր, որ մեկ տարի է, ինչ աշխատում է տվյալ գեղեցկության սրահում:

Վկան դատարանում, նայելով գործով ամբաստանյալներին, հայտնեց, որ նստածներից ճանաչում է Գեղամին: Խոսքը գործով ամբաստանյալ, «չարբախցի Գեղամ» մականունով հայտնի Պետրոս Իսրայելյանի մասին է:

Վկան հայտնեց, որ առանց ակնոցների է եկել դատարան և չի կարող կարդալ իր իրավունքների և պարտականությունների, ցուցմունք տալուց հրաժարվելու և սուտ ցուցմունք տալու համար նախատեսված քրեական պատասխանատվության վերաբերյալ հուշաթերթիկը:

Դատավորի պարզաբանումից հետո միայն վկան ստորագրեց հուշաթերթիկը, հայտնելով, որ հիշողության հետ կապված խնդիրներ ունի:

Նա պատմեց, որ դեպքի օրը գեղեցկության սրահ է եկել Ռուբենը, ով վարսավիր Ալբերտի հաճախորդն էր: Նշենք, որ խոսքը այս գործով նախկին մեղադրյալ Ռուբեն Խաչատրյանի մասին է, որ այս գործով վկայի կարգավիճակ ունի: Նախաքննության ընթացքում 8 ամիս անազատության մեջ մնալուց հետո, նրա մասով գործի վարույթը կարճվել է և նրա նկատմամբ քրեական հետապնդումը դադարեցվել:

Ռուբեն Խաչատրյանն, ում անունն այսօրվա նիստին դատակոչված վկաների ցանկում էր, դատարանին գրավոր տեղեկացրել էր, որ առողջական խնդիրներ ունի և չի կարող ներկայանալ դատարան: Նա երկու տեղեկանք էր ներկայացրել՝ տրված շտապօգնության բրիգադի բժիշկների կողմից: Սակայն մեղադրող դատախազները նկատեցին, որ հիշյալ վկան ստացիոնար բուժման մեջ չի գտնվում և նրա ներկայությունը դատական նիստին բացառող հանգամանքներ չկան:

Մեղադրողները միջնորդեցին այս վկային դարձյալ ծանուցել և հրավիրել դատարան:

Ինչևէ, անդրադառնալով վկա Վարդիկ Մկրտչյանի հարցաքննությանը, նշենք, որ նա իրարամերժ տեղեկություններ էր հայտնում դատարանին՝ ժամանակ առ ժամանակ հիշեցնելով, որ մեծ կին է, հիշողության հետ կապված խնդիրներ ունի:

Նա իր ցուցմունքում նկարագրեց, թե ինչպես էին երկու հոգի մի ջահել տղայի ձեռքերից ու ոտքերից բռնած գեղեցկության սրահից դուրս հանում:

«Հետո իմացա, որ այդ տղան Գևորիկն էր (խոսքը սպանված, 25-ամյա Գևորգ Ավետիսյանի մասին է): Հետո տեսա, թե ինչպես է Արամը ձախ կողքը բռնած դուրս գալիս»,-պատմեց վկան՝ նշելով, որ ինքը դա տեսնելով վախից սկսել է դողալ:

Վկան հայտնեց, որ գեղեցկության սրահում մի երկու կաթիլ արյուն է եղել, ինչը ինքը մաքրել է, սակայն թե ինչ է եղել նկուղում, տեղյակ չէ, երբևէ նկուղում չի եղել:

Նշենք, որ նախաքննական ցուցմունքում վկան մանրամասներ է հայտնել նկուղում եղած հետքերը վերացնելու մասին: «Ինձ կանչեց Անժելան, ասաց հատակը մաքրիր: Էնտեղ կոտրված կավի հետքեր կային, ծխախոտի մնացորդներ ու արյան հետքեր»,-իր նախաքննական ցուցմունքում նշել էր վկան:

Վարդիկ Մկրտչյանը դատարանում հայտնեց, որ իրեն դեպքից հետո տարել են բաժին, որտեղ ահաբեկել և նվաստացրել են: «Ահաբեկելով, կոպիտ խոսելով էս սենյակից էն սենյակն էին տանում: Ասում էին՝ հեսա քեզ կտանենք կանանց գաղութ՝ նոր կիմանաս: Թզբեհը գցեցին դեմս, ասացին՝ սովորի, որ Աբովյանի գաղութում գցես»,-պատմեց վկան և հավելեց, որ բաժնում իրեն անգամ ցանկացել են ծեծել, ստորացնել:

Դատախազի հարցին, թե ինչու՞ իր նկատմամբ կատարված ենթադրյալ ճնշումների մասին չի բողոքել, վկան պատասխանեց. «Ու՞մ բողոքեի, միսն էլ ա իրանց ձեռը, դանակն էլ»:

Դատախազի մյուս հարցին, թե ինչ-որ մեկը ձեզ ուղղորդե՞լ է, վկան պատասխանեց՝ ոչ:

«Սաղ իմ խելքով եմ գրել»,-ասաց նա, սակայն որոշ ժամանակ անց ինքն իրեն հակասելով հայտնեց, որ նախաքննական ցուցմունքներն ինքը չի գրել: Ավելին, նրա խոսքով՝ քննիչներն իրեն ամբողջ գիշեր պահել են, անընդհատ հարցեր տվել, վիրավորել:

Ի դեպ, հիշյալ վկայի հարցաքննության ընթացքում նախագահող դատավոր Նելլի Բաղդասարյանը երկու անգամ նախազգուշացման տեսքով սանկցիա կիրառեց մեղադրող դատախազ Քյարամյանի նկատմամամբ՝ առանց նախագահողի թույլտվության տեղից հայտարարություն անելու համար:

«Դատավորի հարցերին պատասխանեք ոտքի կանգնած, կրկնվող և հուշող հարցեր մի տվեք»,- հայտարարեց դատավորը: Երբ դատախազը պարզաբանեց, որ ինքը վկային ընդամենը հարցեր է ուղղում, իսկ քրեադատավարական որևէ նորմով սահմանված չէ վկային կանգնած հարցեր ուղղելը, դատավորը բարկացավ նրա վրա՝ սպառնալով հերթական սանկցիան կիրառել և դատական նիստը հետաձգել:

«Կարող եք կրկնվող հարցերը հանել»,-արձագանքեց դատախազն, ինչին ի պատասխան դատավոր Նելլի Բաղդասարյանը ասաց. «Նախագահող դատավորը ձեր խորհուրդների կարիքը չունի»:

Այսօրվա նիստում ցուցմունք տվեց նաև սիրիահայ Ջորջ Քրդանյանը: Դատավորը նշված վկայի անձնական տվյալները ճշտելու հնարավորություն չունեցավ, քանի որ վկան դատարան էր ներկայացել սիրիական անձնագրով:

Վկան, ով դժվարությամբ էր խոսում հայերեն և ընկալում իրավաբանական տերմինները, դատարանից հայտնեց, որ չգիտի, թե ինչու են իրեն, որպես վկա ներգրավվել, քանի որ ինքը ոչինչ չի տեսել: Վկան հայնեց, որ մեկ տարի է, ինչ բնակվում է Շիրակի փողոցում, իսկ գեղեցկության սրահը գործում է իրենց շենքի հարևանությամբ: Նա հայտնեց, որ պատուհանից տեսել է հավաքված մարդկանց, սակայն չի իմացել, թե ինչ դեպք է եղել:

Հաջորդիվ հարաքննվեցին այս գործով ամբաստանյալ Պետրոս Իսրայելյանի հարազատները:

Թագուհի Մելքոնյան