Կհաստատվի Հայաստանում գործող դեղագրքերի ցանկը

Կառավարության վաղվա նիստի օրակարգում առողջապահության նախարարությունը ներառել է Հայաստանում գործող դեղագրքերի ցանկը հաստատելու մասին որոշումը:

Դեղագիրքը (ֆարմակոպեա)` դեղագրքային հոդվածների, դեղերի և դրանց բաղադրատարրերի որակը վերլուծելու, հսկելու մեթոդների և այլ չափորոշիչ պահանջների ժողովածու է, որտեղ նկարագրված են դեղերի և դրանց բաղադրատարրերի որակի ցուցանիշները և հսկելու մեթոդները:  «Դեղերի մասին» ՀՀ օրենքի 16-րդ հոդվածի 7-րդ մասի համաձայն  Հայաստանի Հանրապետությունում գրանցման ենթակա արտադրանքի, ակտիվ և օժանդակ բաղադրատարրերի, տարայի և խցանափակման նյութերի որակը պետք է համապատասխանի Հայաստանում ընդունված դեղագրքերի պահանջներին:

Հայաստանի Հանրապետությունում կարող են գրանցվել, արտադրվել, իրացվել միայն որակի միանման պահանջներին համապատասխանող դեղեր: Այդ միասնականությունը ապահովվում է նաև գործող դեղագրքերի ցանկը հաստատելու միջոցով, քանի որ ցանկում ընդգրկված դեղագրքերը մշտապես ներդաշնակեցվում են  և պարունակում են դեղի որակի նկատմամբ համարժեք պահանջներ, ներառյալ՝ միասնական չափման միավորներ, ընդհանուր պահանջներ որակի հսկման լաբորատորիաների սարքերի, սարքավորումների նկատմամբ, ընդհանուր պահանջներ ֆիզիկական, ֆիզիկաքիմիական, քիմիական, կենսաբանական և այլ վերլուծության մեթոդների նկատմամբ, ինչպես նաև միանման պահանջներ ստանդարտ նմուշների նկատմամբ:

Դեղագրքերի հիման վրա  արտադրողը կամ արտադրանքի համար պատասխանատու անձը կազմում են որակի հատկորոշիչներ, որոնք կցվում են  գրանցման հայտին և ենթարկվում են մանրամասն  փորձաքննության: «Դեղերի մասին» ՀՀ օրենքի 16-րդ հոդվածի 6-րդ մասին համաձայն, ի թիվս այլ փաստաթղթերի  հաստատվում է նաև որակի   սպեցիֆիկացիան: Ուստի դեղագրքերի  ցանկի  ընտրության ժամանակ կարևորվում է  դեղագրքի կիրառման շրջանակները, մշակման գործընթացի  հստակությունն ու  թափանցիկությունը, հասանելիությունը:  Հաշվի առնելով այն, որ գրանցման ներկայացվող դեղերի գերակշռող մեծամասնությունը արտադրվում են ԱՊՀ և Եվրոմիության անդամ երկրներում, ինչպես նաև  Հայաստանի անդամակցությունը Եվրասիական տնտեսական միությանը, դիտորդի կարգավիճակը Եվրոպական և ԱՄՆ դեղագրքային հանձնաժողովներում,  հիմք ընդունելով նաև այն  հանգամանքը, որ գրանցման պարզեցված ընթացակարգի դեպքում ճանաչվում են դեղերի գրանցման տեխնիկական պահանջների ներդաշնակեցման միջազգային համաժողովի անդամ երկրներում (ԱՄՆ, Եվրամիություն, Ճապոնիա) գրանցման և ԱՀԿ նախաորակավորման  ընթացքում  կատարված փորձաքննությունների արդյունքները, ցանկում ընդգրկվել են այդ երկրների, միությունների և կազմակերպությունների դեղագրքերը:

Նախագծի ընդունման արդյունքում ակնկալվում է հսկողական մեխանիզմներ սահմանել Հայաստանի Հանրապետությունում դեղերի և դրանց բաղադրատարրերի չափորոշիչ պահանջների պահպանման նկատմամբ` բացառելով Հայաստանի Հանրապետությունում անորակ և չափորոշիչ պահանջներին չբավարարող դեղերի և դրանց բաղադրատարրերի առկայությունը: