Կհաստատվի խնամք և պաշտպանություն իրականացնող հաստատություններում խնամվող երեխաների խնամքն ընտանիքներում ապահովելու ծրագիրը

Կառավարությունը պատրաստվում է վաղվա նիստում հաստատել ՀՀ խնամք և պաշտպանություն իրականացնող շուրջօրյա հաստատություններում խնամվող երեխաների վերադարձն ընտանիքներ կազմակերպելու' բեռնաթափման, և երեխաների մուտքը հաստատություններ կանխարգելելու ծրագիրը:

Այս կարգավորումով կառավարությունը կյանքի դժվարին իրավիճակում գտնվող երեխաների խնամքն և դաստիարակությունն ընտանիքներում ապահովելու նպատակ ունի:

Բեռնաթափման ծրագիրը աշխատանքի և սոցիալական հարցերի նախարարությունն իրականացնում է 2006 թվականից: Այդ տարում Լոռու մարզի հաստատություններում խնամվում էր շուրջ 1000 երեխա: Երեխաների ոլորտում իրականացվող սոցիալական բարեփոխումների քաղաքականության շրջանակներում իրականացված հատուկ հանրակրթական ուսումնական հաստատությունների վերակազմակերպման գործընթացի արդյունքում  շուրջ 200 երեխա վերադարձել է ընտանիք: Իսկ վերոնշյալ ծրագրի շրջանակներում 2006 թվականից մինչ օրս  Լոռու մարզի հաստատություններից ընտանիք է վերադարձել շուրջ 295 երեխա, և 105 երեխայի մուտքը հաստատություններ կանխարգելվել է:  Ներկայում այդ հաստատություններում խնամվող երեխաների թիվը շուրջ 450 է:

Ծրագրով նախատեսվում է նաև Շիրակի մարզում խնամք և պաշտպանություն իրականացնող շուրջօրյա հաստատություններում խնամվող երեխաների հաստատություններից բեռնաթափում և այդ հաստատություներ երեխաների մուտքի կանխարգելում: Ծրագրի իրականացման անհրաժեշտությունը պայմանավորված է նաև այն հանգամանքով, որ մարզում գրանցվել  է աղքատության բարձր մակարդակ: Համաձայն 2012թ. «Հայաստանի սոցիալական պատկերը և աղքատությունը վիճակագրական վերլուծական զեկույցի» տվյալների ՀՀ Շիրակի մարզում աղքատությունը կազմում է 47.7 տոկոս (հանրապետությունում աղքատության միջին ցուցանիշը 35 տոկոս է): ՀՀ Շիրակի մարզում մանկական աղքատության մակարդակը նույնպես  ամենաբարձրն է և կազմում է 56.0 տոկոս: Ինչպես նաև մարզում գործում է երեխաների խնամք և պաշտպանութուն իրականացնող  շուրջօրյա 7 հաստատություն, որտեղ խնամվում և դաստիարակվում է շուրջ 560 երեխա: