Կհաստատվի օրգանական գյուղատնտեսության ոլորտում հավատարմագրում իրականացնող միջազգային կազմակերպությունների ցանկը

Կառավարության վաղվա նիստի օրակարգում գյուղատնտեսության նախարարությունը ներառել է նախագիծ` օրգանական գյուղատնտեսության ոլորտում հավատարմագրում իրականացնող միջազգային կազմակերպությունների ցանկը հաստատելու մասին:

«Օրգանական գյուղատնտեսության մասին» ՀՀ օրենքի 7-րդ հոդվածի  1-ին մասի համաձայն օրգանական գյուղատնտեսական արտադրանքի համապատասխանության հավաստումն իրականացնում է սերտիֆիկացման մարմինը «օրգանական» կամ «անցումային շրջանի օրգանական» սերտիֆիկատ տալու միջոցով:

Սերտիֆիկացման մարմնին հավատարմագրում է ՀՀ  օրենքով սահմանված կարգով կամ ՀՀ կառավարության հաստատած ցանկում ներառված օրգանական գյուղատնտեսության ոլորտում հավատարմագրում իրականացնող միջազգային կազմակերպությունների կողմից: Մինչ օրս միջազգային այդ կազմակերպությունների ցանկը հաստատված չէ:

Որոշման ընդունման դեպքում միջազգային կազմակերպությունների կողմից կապահովվի Հայաստանի Հանրապետությունում օրգանական գյուղատնտեսական արտադրանքի համապատասխանության հավաստումն իրականացնող սերտիֆիկացման մարմինների  հավատարմագրման գործընթացի օրինականությունը: