Դուք պետք է դառնաք մարզերում մեր ծրագրերի իրականացման առաջատարները. Լևոն Ալթունյան

Բժշկական ի՞նչ ծառայություններ են ընդգրկվելու մոտ 620 հազար սոցիալապես անապահով բնակչության հիվանդանոցային բժշկական ծառայությունների ապահովագրական փաթեթներում, ե՞րբ երկրում կներդրվի պարտադիր բժշկական ապահովագրությունը, համակարգում քանի՞ կլինիկական ուղեցույց և գործելակարգ կներդրվի մինչև 2021թ.` այս և էլի մի շարք հարցեր էին հետաքրքրում Գեղարքունիքի մարզի երիտասարդ մասնագետներին։

Նախարար Լևոն Ալթունյանը հանգամանալից պատասխաններ ու պարզաբանումներ տալով` միաժամանակ փորձել է ճշտել նրանց մոտեցումները ոլորտում իրականացվող ծրագրերի վերաբերյալ։

Մարտունու բժշկական կենտրոնի երիտասարդ դիմածնոտային վիաբույժ Դավիթ Խաչատրյանը ողջունելով էլեկտրոնային առողջապահական համակարգի ներդրումը` հետաքրքրվել է հեռաբժշկության զարգացման հնարավորություններով։ Լևոն Ալթունյանը ծանոթացրել է նաև այդ ծրագրին։

Գեղարքունիքի մարզի երիտասարդ մասնագետների հետ քննարկվել են նաև Հայաստանում պալիատիվ ծառայության և խնամքի կենտրոնների ներդրման ծրագիրը։ Նախարարը նշել է, որ այդ ծրագրերում կընդգրկվեն օպտիմալացման արդյունքում կրճատված բուժաշխատողները։ Նրանց մի մասն էլ` վերապատրաստվելով, կաշխատեն որպես նեղ մասնագետներ։

Հանդիպման ընթացքում  կարևովել է մասնագիտական ասոցիացիաների գործունեության ակտիվացումը հատկապես մարզերում։ Միաժամանակ, առաջարկ է հնչել ուժեղացնելու մայրաքաղաքի բազմապրոֆիլ հիվանդանոցների և առաջատար մասնագետների կապը մարզային բժշկական կենտրոնների հետ։ Նախարարը ծանոթացրել է այս ուղղությամբ տարվող աշխատանքներին։

«Մենք ուզում ենք, որ դուք մարզերում դառնաք մեր ծրագրերի իրականացման առաջատարները։ Ես տեսնում եմ, որ դուք դա կարող եք»,-նշել է ՀՀ առողջապահության նախարար Լևոն Ալթունյանը։