Ֆուտբոլի Հայաստանի առաջնություն. 22-րդ տուրում առաջատարները դուրս կգան իրար դեմ

 Ֆուտբոլի Հայաստանի բարձրագույն խմբի առաջնության հերթական`  22-րդ տուրի խաղերը տեղի կունենան ապրիլի 19-ին և 20-ին:

«Հրազդան» մարզադաշտում տեղի կունենա տուրի կենտրոնական հանդիպումը` ընթացիկ առաջնության առաջատար «Արարատ»-ը կմրցի 2-րդ տեղում ընթացող «Բանանց»-ի հետ: Այս մրցաշրջանում թիմերն արդեն հանդիպել են 3 անգամ: Առաջին 2 դեպքերում գրանցվել է գոլազուրկ արդյունք, իսկ 3-րդ խաղաշրջանում «Բանանց»-ը հաղթել է 2:1 հաշվով:

«Գանձասար»- «Շիրակ»

Կապանում Գանձասարը կմրցի «Շիրակ»-ի հետ:  Հետաքրքիր է, որ այս մրցաշրջանում «Շիրակ»-ը դեռևս չի կարողացել հաղթել «Գանձասար»-ին: 1-ին տուրում կապանցիներ առավելության են հասել 3:2 հաշվով, 2-րդ խաղաշրջանում գյումրեցիները 2 անպատասխան գնդակ են ընդունել սեփական դարպասը, իսկ թիմերի 3-րդ դիմակայությունն ավարտվել է 1:1 հաշվով:

«Միկա»- «Փյունիկ»

 «Միկա»-ն և «Փյունիկ»-ը կմրցեն «Միկա» մարզադաշտում: Այս թիմերի նախորդ 3 հանդիպումներում գրանցվել են հետաքրքիր արդյունքներ: Նախ` առաջին տուրում թիմերը փոխանակել են մեկական գնդակ, այնուհետև 2-րդ խաղաշրջանում «Միկա»-ն հաղթել է խոշոր 3:0 հաշվով, իսկ ահա 3-րդ խաղաշրջանում «Փյունիկ»-ը 4 անպատասխան գնդակ է ուղարկել միկայականների դարպասը:

«Ալաշկերտ»- «Ուլիս»

Հետնապահները կմրցեն «Հանրապետական» մարզադաշտում: Մրցաշարային աղյուսակը եզրափակող և հավասար միավորներ ուղնեցող այս 2 թիմերի միջև առաջին պայքարն ավարտվել է 1:1 հաշվով:  8-րդ տուրում «Ուլիս»-ը հաղթել է 2:1 հաշվով, իսկ ահա 3-րդ խաղաշրջանում հաջողությունն ուղեկցել է «Ալաշկերտ»-ին: Գուլբուդաղյանցի սաները հաղթել են խոշոր` 3:0 հաշվով: