Եթե ԲՀԿ-ում իրենց հարցերը չկարողանան լուծել, դրանով կզբաղվեն իրավապահները. Վահրամ Բաղդասարյան

Այսօր` խորհրդարանական ճեպազրույցների ժամանակ, ԱԺ 5-րդ գումարման ՀՀԿ խմբակցության ղեկավար Վահրամ Բաղդասարյանը պատասխանեց լրագրողների հարցերին:

Yerkir.am-ի դիտարկմանը` Լևոն Զուրաբյանը ՀՀԿ-ին է մեղադրում «Ծառուկյան» դաշինքում տեղի ունեցած իրադարձությունների մեջ, Բաղդասարյանն արձագանքեց. «Ես շատ շնորհակալ եմ, որ բավականին բարձր են գնահատում Իշխանության ու ՀՀԿ-ի դերը: Ես ևս մեկ անգամ հայտարարում եմ, որ մենք այլ կուսակցության ներքին հարցերի հետ ոչ մի կապ չունենք: Համբերեք ևս մի քանի օր, և նրանք իրենց հարցերը կլուծեն: Եթե ԲՀԿ-ում իրենց հարցերը չկարողանան լուծել, դրանով կզբաղվեն իրավապահները»:

Պարզաբանելով, թե, «իրավապահները կզբաղվեն» ասելով, ի՞նչ նկատի ունի, նա ասաց, որ եթե լինեն խնդիրներ, այդ քաղաքական ուժի անդամները կդիմեն իրավապահների:

Լրագրողի հարցին էլ, թե Զուրաբյանը Երևանի ավագանու ընտրության մասնակիցներին նմանեցնում է Շրեկին, Չիպոլինոյին, Ձյունանուշիկին, ինքը նմանություն տեսնո՞ւմ է, Բաղդասարյանն արձագանքեց. «Այ եթե հայտարարություն անողը մասնակցեր այդ ընտրություններին ես կմեկնաբանեի, բայց եթե նրանք իրենց ռեսուրսներն արդեն գնահատել են և չեն մասնակցում ընտրություններին, ես նպատակահարմար չեմ գտնում մեկնաբանել նրա ասածները»:

Հարցին էլ` արդեն հստակեցվե՞լ է` Արփինե Հովհաննիսյանը, Հրայր Թովմասյանը, Գևորգ Կոստանյանը որտեղ կհայտնվեն, և արդյո՞ք Գալուստ Սահակյանը կլինի նորընտիր ԱԺ նախագահը, պատասխանեց` համբերեք, քիչ ժամանակ է մնացել, կիմանաք: