Հնգյակ ունեցած ընտանիքը վարձով է ապրում` 16 քմ սենյակում. մանրամասներ

Արդեն տեղեկացրել ենք, որ մեծամորցի կինն այսօր լույս աշխարհ է բերել 5 երեխա` 4 աղջիկ, 1 տղա:

Այս պահին «Էրեբունի» ծննդատան նախասրահում հավաքվել են ընտանիքի հարազատները: Նորածինների հորական տատիկը` Ռոզա Մարուքյանը,  Yerkir.am-ի հետ զրույցում նշեց, որ «դեռ օդերում է»  ու չի պատկերացնում, որ միանգամից 5 երեխայի տատիկ է դարձել:

«Նրանց մոտ ամեն ինչ միանգամից է եղել` նշանվելը, ամուսնանալը: Այդպես էլ երեխաների հարցում եղավ: Սպասում էինք` ամեն ինչ բարով-խերով ավարտվի, որ մյուս հարցերը լուծենք, դեռ օրորոցներ էլ չենք գնել»,- ասաց նա:

Տիկին Ռոզան նաև նշեց, որ նորաստեղծ ընտանիքն այս պահին խնդրի առջև է կանգնած: «Տղաս` Վարդանը, վարձով է ապրում: Նրանց սենյակը 16 քմ է, չգիտեմ` ոնց, բայց հույս ունեմ` ամեն ինչից գլուխ կհանենք, բնակարանի հարցն էլ մի ձևով կլուծվի»,- նշեց նա: