Մարդիկ, ցավոք, ավելի շատ սպասելիքներ ունեն այն թեկնածուից, ով ունևոր է. ՀՀԿ-ական

ՀՀԿ-ական պատգամավոր Լեռնիկ Ալեքսանյանը, ով չընդգրկվեց ԱԺ ընտրությունների ՀՀԿ ցուցակում, դրական է գնահատում ընտրությունների ընթացքը` մեծ քայլ առաջընթացով: Yerkir.am-ի հետ զրույցում կարծիք հայտնեց, որ թե ժողովրդի, թե ընդդիմադիր ուժերի կողմից առանձնապես ասելու բան չկա ընտրությունների ընթացքի հետ կապված: Ինչ վերաբերում է ընտրակաշառքին, Լեռնիկ Ալեքսանյանի խոսքով, նման բան եղել է, ոչ ոք չի կարող ժխտել:

Լեռնիկ Ալեքսանյանը, այնուամենայնիվ, ընտրակաշառքով ընտրություն կատարելու մեջ չի մեղադրում ոչ ժողովրդին, ոչ էլ քաղաքական ուժերին:

«Ես մեղադրում եմ իրավիճակին, ժողովուրդն էլ ճանապարհ պետք է անցնի: Եղել է, որ մարդիկ գումար են վերցրել, բայց ազատորեն արտահայտել են իր կամքը: Ակնհայտ է, որ մարդիկ ավելի շատ սպասելիքներ ունեն այն թեկնածուից, ով ունևոր է, քան այն մարդուց, ով մտավոր է»,- ասաց Լեռնիկ Ալեքսանյանը` ընդգծելով, որ այս ընտրություններին ճնշում ու պարտադրանք չի եղել:

Նրա խոսքով` ցավալի է, բայց փաստ, որ այսօր փողն ու փող ունեցողն է կարևորվում մարդկանց մեջ, և ժողովուրդը դեռ չունի քաղաքական հասունություն, որ հասկանան` այդ 10 հազար դրամը հետագա 5 տարիների համար չի աշխատելու: Նա ընդունում է, որ մեր հասարակության մեջ դեռևս գերակշռում է ծանոթ-բարեկամ-համագյուղացի  սկզբունքով ընտրություն կատարելու սովորույթը, ինչը խիստ բացասական է, և չի նպաստում զարգացմանը: Եվ ստացվում է, որ եթե քաղաքացին լավ համագյուղացի է, ընտանիքի լավ հայր, լավ ընկեր, ապա նույն այդ մարդը պետության լավ քաղաքացի չէ իր մտածողությամբ: