Շատ դիմումներ կան, որ մարդիկ պահանջում են իրենց աշխատավարձից ավելի շատ պահել. Վիգեն Սարգսյան

ԱԺ հերթական քառօրյա նիստում քննարկվում է բանակում հատուցման համակարգն ապահովող հիմնադրամի ստեղծման հարցը՝ «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագիծը, որի մասին զեկուցեց պաշտպանության նախարար Վիգեն Սարգսյանը:

ՀԱԿ խմբակցության պատգամավոր Հրանտ Բագրատյանը հարցրեց, թե ո՞րն է տարբերությունը հիմնադրամի ու ներդրումային ֆոնդի միջև:

«Ասում եք` սա նպաստ չէ, ապահովագրություն է, ուրեմն ցույց տվեք ապահովագրական ռիսկը: Եթե ռիսկ չկա, ի՞նչ կարիք կա հիմնադրամ ստեղծելու, ԿԲ-ին ներգրավելու, ապարատ ստեղծելու: Իսկ եթե փողն ազատ է՝ ի՞նչ իմաստ ունի այն արտասահմանում արժեթղթերի մեջ ներդնել: Նշեք հարկի ու պարտադիր վճարի տարբերությունը: Զինվորն ինչո՞ւ աշխատավարձ չի ստանում, ինչո՞ւ չենք մտահոգվում ողջ զինվորների մասին, դա էլ է կարևոր»,- հարցրեց Հրանտ Բագրատյանը:

Վիգեն Սարգսյանը պատասխանեց, որ ժամկետային զինծառայողի համար ունեն նվազագույն վճար, որը փոխհատուցում է պարենային ու տրանսպորտային խնդիրները: Նախարարի խոսքով` դա, իհարկե, փոքր գումար է, քան այն, ինչը կցանկանար ինքը` որպես նախարար: Սակայն եթե պատգամավորը կարող է որոնել ժամկետային զինծառայողին միջին աշխատավարձ տալու աղբյուրներ, ապա Վիգեն Սարգսյանը միայն երջանիկ կլինի:

Ինչ վերաբերում է հիմնադրամի ու ներդրումային ֆոնդի միջև տարբերությանը, Վիգեն Սարգսյանի խոսքով` ներդրումային ֆոնդն ունի այլ խնդիրներ, հիմնադրամը՝ այլ, դա չի նշանակում, որ հիմնադրամը չի կարող արժեթղթերի մեջ ներդրումներ չունենալ:

1000 դրամը նպաստ չէ, որովհետև, ըստ նախարարի, նպաստը ենթադրում է սոցիալական բաղադրիչ, մինչդեռ վճարում են այն զինծառայողի համար, ով գնացել է առաջնագիծ ու զոհվել թշնամու գնդակից:

Հրանտ Բագրատյանն առաջարկեց Դիլիջանում գտնվող 44 միլիոն դոլարանոց կենտրոնը վաճառել ու ներդնել ֆոնդում՝ առաջին երկու տարվա համար:

Նախարարի խոսքով՝ ֆոնդում ամեն տարի կհավաքվի նվազագույնը 4,5 միլիարդ դրամ: «Շատ դիմումներ կան, որ մարդիկ պահանջում են իրենց աշխատավարձից ավելի շատ պահել, ինչը վստահություն է տալիս մեզ, որ ճիշտ ճանապարհի վրա ենք»,- ասաց նա՝ վստահեցնելով, որ որևէ մեկն ավելի շատ չի մտածում զինվորի մասին, քան ինքը: