Ես ի՞նչ կարող եմ անել, ես փող չեմ բաժանելու. Հրանտ Բագրատյան

Այսօր լրագրողների հետ զրույցում ՀԱԿ խմբակցության պատգամավոր Հրանտ Բագրատյանն անդրադարձավ ներքաղաքական հարցերին: Հիշեցնենք, որ Բագրատյանը առաջիկա խորհրդարանական ընտրություններին մասնակցելու է «Ազատ դեմոկրատներ» կուսակցության ցուցակով` թիվ 4 ընտրատարածքում, որն ընդգրկում է նաեւ Կենտրոն համայնքը:

Հարցին, թե արդյո՞ք վարկանիշային ցուցակներով ընտրակարգը չի նշանակում ՀՀԿ-ի ինքնամաքրման պրոցես, քանի որ արդեն իսկ ՀՀԿ-ական թեկնածուների միջև բախումներ են սկսվել, Հրանտ Բագրատյանը պատասխանեց, որ համաձայն չէ ինքնամաքրման թեզին: «Ինքնամաքրման թեզ լինել չի կարող, որովհետև միայն 7 պատգամավոր է, որ ՀՀԿ  ցուցակում չկա, պարզապես երիտասարդներին մի քիչ առաջ են բերել համամասնականում, իսկ տարիքովներին ներառել են վարկանիշային ցուցակում, որտեղ նրանք իրենց սև գործը կանեն, որևէ այլ փոփոխություն չկա»,- ասաց նա:

Ինչ վերաբերում է ընտրակաշառքին, Հրանտ Բարատյանը նշեց. «Իհարկե, մենք արդեն գիտենք ՀՀԿ թեկնածուի կողմից փողերի բաժանման մասին, փաստեր ունենք, մյուսներին չեմ կարող գնահատական տալ: Բայց ես ի՞նչ կարող եմ անել, ես փող չեմ տալու»,-ասաց նա` հավելելով, որ ամեն մարդ անելու է այն, ինչ կարող է անել: