Փաստի առաջ չեմ կանգնեցրել Լևոն Տեր-Պետրոսյանին. Հրանտ Բագրատյան

Արդեն տեղեկացրել ենք, որ «Հանրապետություն» կուսակցության 6-րդ համագումարին ներկա է նաև «Ազատություն» կուսակցության նախագահ, ՀՀ նախկին վարչապետ Հրանտ Բագրատյանը:

Թեև նա խուսափում է լրագրողներից, սակայն Yerkir.am-ի լրագրողի դիտարկմանը, թե տպավորություն է, որ իր` նախագահի թեկնածու առաջադրվելու մասին հայտարարությամբ փաստի առաջ կանգնեցրեց Լևոն Տեր-Պետրոսյանին, Բագրատյանը կոնկրետ պատասխան չտվեց. նախ ասաց, թե տղաներին վաղուց չի տեսել (նկատի ունի ՀԱԿ անդամներին-խմբ.), ապա կատակով, թե` նրանց հետ շատ գաղտնի զրույց է ունենալու հայ-ադրբեջանական ռազմական առճակատման մասին: «Դուք ուզո՞ւմ եք` պատերազմ լինի»,- հետաքրքրվեց Բագրատյանը:

Լրագրողների դիտարկմանը, որ ցանկանում են հասկանալ` ինչո՞ւ առաջ ընկավ Տեր-Պետրոսյանից, նա պատասխանեց. «Այն ինչ ասված է իմ հայտարարության մեջ, բավարար է: Ես փաստի առաջ չեմ կանգնեցրել Լևոն Տեր-Պետրոսյանին»: