Գերմանացի պաշտոնյաները դեմ են, որ Էրդողանը հանրահավաք անցկացնի իրենց երկրում

Գերմանիայում չեն ցանկանում, որ Թուրքիայի նախագահ Ռեջեփ Թայիփ Էրդողանը սահմանադրական հանրաքվեին նվիրված հանրահավաք անցկացնի իրենց երկրում. տեղեկացնում է Ermenihaber-ը:

Ըստ թուրքական «Sondakika» լրատվական կայքի՝ Հյուսիսային Ռեյն Վեստֆալիա նահանգի ներքին գործերի նախարար Ռալֆ Յագերը հայտարարել է, որ դաշնային կառավարությունը պետք է կանխի Գերմանիայում նմանատիպ հանրահավաքների կազմակերպումը:

«Այստեղ գործող խոսքի ազատությունը չի կարող չարաշահվել հանուն այնպիսի սահմանադրական փոփոխությունների քարոզարշավի, որոնք սահմանափակում են հիմնարար իրավունքները և վերականգնում մահապատիժը: Պետք է թույլ չտալ, որ Թուրքիայի ներքաղաքական լարվածությունը Գերմանիա ներմուծվի»,- ասել է նա:

Գերմանացի այլ պաշտոնյաներ ևս դեմ են արտահայտվել Գերմանիայում նմանատիպ ցույցերի անցկացմանը: Նրանց շարքում է Գերմանիայի կառավարության փախստականների և միգրացիայի հարցերով պատասխանատու` ծագումով թուրք Այդան Օզողուզը:
Նա նշել է, որ 2008 և 2014 թվականներին Էրդողանը Գերմանիայում  բազմամարդ ցույցեր է կազմակերպել, սակայն չպետք է թույլ տալ, որ դա դառնա սովորություն:

Թուրքական կայքը Գերմանիայի այս դիրքորոշումը «երկերեսանիություն» է որակել, քանի որ Գերմանիայի իշխանությունները Քուրդիստանի բանվորական կուսակցությանը (PKK-ՔԲԿ) թույլ են տալիս  ցույց կազմակերպել Քյոլնում, ինչպես նաև աջակցում են FETÖ-ին, բայց Էրդողանի հավաքին «խոչընդոտելու» կոչով արշավ են իրականացնում: