Զինծառայողների աշխատավարձի բարձրացում նախատեսված չէ. նախարար

Այսօր` լրագրողների հետ հանդիպման ժամանակ, պաշտպանության նախարար Վիգեն Սարգսյանն անդրադարձավ զինծառայողների աշխատավարձի բարձրացման վերաբերյալ հարցին: Նախարարի խոսքով` 2017-ի պետական բյուջեն արդեն հաստատված է,  և դրանում նախատեսված չէ զինծառայողների աշխատավարձերի բարձրացում:

Միաժամանակ, Վիգեն Սարգսյանը նշեց, որ պետք է այնպես անեն, որ սպայական բարձր կոչում ունեցողները ստանան ավելի բարձր աշխատավարձ: Նախարարի համոզմամբ` սպայի մասնագիտությունը պետք է շատ գրավիչ լինի, պատասխանատու, կարևոր, վտանգավոր և շնորհակալ:

«Սպան կառավարման մեծ փորձով, խելացի մարդ է, և պետք է նրա  ինտեգրումը հասարակությանը սահուն անել: Չնայած, որ այսօր նման ծրագիր չկա: Երիտասարդ սպաներն այսօր բավականին մրցունակ աշխատավարձ են ստանում, իսկ թոշակի անցնելիս դեռ տարիքը թույլ է տալիս, որ աշխատեն նաև այլ ոլորտներում։ Մենք պետք է օգնենք նրանց ինտեգրվել քաղաքացիական կյանքին», - ասաց պաշտպանության նախարարը։