Իմ՝ նորմալ կամ աննորմալ վերաբերվելը ոչ մի բան չի փոխում. Մնացականյանը՝ Նաիրի Սահակյանի առաջադրման մասին

Առաջիկա խորհրդարանական ընտրություններում Արագածոտնի մարզից ՀՀԿ-ի ցուցակով առաջադրվող թեկնածուներից է նաև Մնացական Մնացականյանը, ով հիմա էլ մեծամասնական ընտրակարգով պատգամավոր է: Yerkir.am-ի հետ զրույցում Մնացականյանն ասաց՝ թեև ինքը ցանկանում է առաջիկա խորհրդարանում լինել, առաջադրել իր թեկնածությունը, բայց իր այդ քայլը կախված է միայն ու միայն կուսակցության որոշումից:

«Դեռ հստակություն չկա, որևէ բան կոնկրետ չէ, չեմ կարող հստակ բան ասել»,- ասաց նա:

Մնացականյանից հետաքրքվեցինք՝ կարծում է` ժողովուրդը պատրա՞ստ է իրենց մարզից առաջադրվող թեկնածուների շարքում տեսնել նաև Արագածոտնի նախկին մարզպետ Սարգիս Սահակյանի եղբորը՝ Նաիրի Սահակյանին, որի անունը մշտապես ասոցացվում է աղմկահարույց դեպքերի հետ:

«Յուրաքանչյուր կուսակցություն ինքն է որոշում իր թեկնածուին: 7-17 թեկնածու է առաջադրվելու, հիմա թող ժողովուրդը նդրանց միջից ընտրություն կատարի: Կուսակցությունն է որոշում, այնպես որ`  դա մի մասնավոր անձի խնդիր չէ:  Դրան նորմալ վերաբերվեմ, թե` ոչ, դա արդեն կարևոր չէ: Իմ՝ նորմալ կամ աննորմալ վերաբերվելը ոչ մի բան չի փոխում: Իսկ Նաիրի Սահակյանի մասով էլ ասեմ՝ ժողովուրդն ընտրությունների օրը կորոշի` ում պահանջն ունի, ի՞նչ ասեմ»,- ասաց նա՝ հավելելով, որ ցանկություն չունի ժողովրդի շրջանում հարցում կազմակերպել՝ հասկանալու՝ ուզո՞ւմ է տեսնել Նաիրի Սահակյանի թեկնածությունը, թե՞ ոչ:

Նշենք, որ վերոնշյալ ՀՀԿ-ականների ջրերը մի առվով չեն հոսում: Թե ի՞նչ կլինի ընտրությունների ժամանակ, պարզ չէ: