Մարմնամարզության հավաքականի համար տարին հաջող էր

Մարմնամարզության Հայաստանի հավաքականի գլխավոր մարզիչ Հակոբ Սերոբյանն այսօր տեղի ունեցած մամուլի ասուլիսի ընթացքում  ամփոփեց անցնող տարին, ինչպես նաև խոսեց առաջիկա անելիքների մասին:

«Չհաշված օլիմպիական խաղերը` տարին հաջող էր: Տարին սկսեցինք մեծ հաջողությամբ. Մերդինյան Հարությունը դարձավ աշխարհի գավաթակիր: Մեր բոլոր տղաները մեդալներ նվաճեցին:  Միջազգային մրցումներում միշտ ունեցել ենք հաղթողներ: Օլիմպիական խաղերում մեդալի ակնկալիքներ ունեինք: Մինչ այսօր էլ վերլուծում ենք, թե ինչպես ստացվեց, որ Մերդինյան Հարությունը եզրափակիչում ձախողեց: Ընդհանուր առմամբ, այս տարի նվաճել ենք 15 ոսկե, 4 արծաթե և 3 բրոնզե մեդալ, որը, նախորդ տարվա համեմատ, մեծ արդյունք է»,- ասաց նա:

Սերոբյանը նշեց, որ այս տարի Հայաստանի հավաքականը ևս մեկ մրցաշարի կմասնակցի: «Վորոնինի գավաթը շատ լավ մրցաշար է: Այստեղ ուժեղ մրցակցություն է լինում: Փորձելու ենք մասնակցել 2 մեծահասակ և 1 երիտասարդ մարմնամարզիկներով:  Շատ խոստումնալից երիտասարդ ունենք` Խաչիկյան Գագիկը: Այսուհետ ակնկալում ենք մեդալներ նաև երիտասարդներից: Հիմա մեր բյուջեն ավելացել է 20 միլիոնով, և արդեն կարող ենք մրցումներին մասնակցել մի ամբողջ թիմով»,- ասաց մարզիչը:

Անդրադառնալով Հարություն Մերդինյանի կարիերան շարունակելու հարցին` Սերոբյանը նշեց. «Մերդինյանի անձնական մարզիչ Սոս Սարգսյանի հետ երկար ենք մտածել այդ հարցի շուրջ: Առաջարկություն է եղել, որ Մերդինյանը շարունակի մարզումները: Մեզ համար առաջնահերթ առողջությունն է, բայց հետազոտության արդյունքում պարզ է դարձել, որ որևէ լուրջ խնդիրներ չկա: Նա իրեն լավ է զգում և որոշել է, որ պետք է շարունակի, քանի որ ուժերը ներում են: Նրա նպատակն է, որ կարիերան ավարտի օլիմպիական մեդալով»: