Երեխաներ են նայում, վախենում են, կարելի՞ են այդքան բացասական նյութեր. ՀՀԿ-ական պատգամավորը՝ փոխոստիկանապետին

ԱԺ ՀՀԿ խմբակցության պատգամավոր Ալեքսան Պետրոսյանն այսօր խորհրդարանում «Ոստիկանությունում ծառայություն անցնելու» մասին օրենքում փոփոխություններ կատարելու նախագծի քննարկման ժամանակ դիմեց հիմնական զեկուցող` փոխոստիկանապետ Վարդան Եղիազարյանին և նշեց, որ ցանկանում է բարձրացնել քաղաքացիների մտահոգությունները: Ըստ պատգամավորի՝ շատ քաղաքացիներ դժգոհում են, որ վթարների, մահվան դեպքերը տարբեր հեռուստաալիքներով ու, առհասարակ, լրատվական դաշտում շատ հաճախ են ներկայացվում:

«Երեխաներ են նայում, վախենում են, կարելի՞ է այդքան բացասական նյութերով լցնել: Հիմա ավարիա է եղել, կամ դժբախտ դեպք է պատահել, մարդ է մահացել, պարտադի՞ր է մեռած ու արյունոտ մարդուն ցույց տալ, երեխաներ են նայում, տհաճ է, կարելի է որպես ինֆորմացիա ասել, բայց էդքան գունավոր ցույց տալ պետք չէ»,- ասաց պատգամավորը, ապա նշեց՝ լավ կլինի, որ քիչ կամ «մի քիչ պարկեշտ ձևով ցույց տրվեն»:

Պետրոսյանը մտահոգություն հայտնեց, որ այդպիսի նյութերը նմանվում են «կինոյի», ապա հետաքրքրվեց՝ հնարավոր չէ՞, որ ոստիկանությունը հաղորդի, որ ավելի քիչ ցույց տան:

Փոխոստիկանապետ Վարդան Եղիազարյանը պատգամավորի մտահոգություններին արձագանքեց՝ նշելով՝ եթե ուշադիր նայեն մասմեդիայի դաշտը, կտեսնեն՝ ոստիկանության չափը բավական քիչ է այդտեղ: «Բազմաթիվ կայքեր, լրագրողներ, հետաքննություն իրականացնողներ չարաշահում են դա: Էդ ֆոնի վրա ոստիկանությունը բավականին զուսպ է, և մեր կայքն ու 02-ը բավական զուսպ են, մենք ունենք մեր աշխատանքային նորմերը»,- ասաց նա: