Արթուր Օսիկյանի պաշտոնակությունը տխրեցրել է փոխոստիկանապետին

Այսօր ՀՀ արդարադատության նախարար Հովհաննես Մանուկյանը Քրեակատարողական վարչության աշխատակիցներին ներկայացրեց վարչության նոր պետին՝ Արթուր Օսիկյանին: Նա ՀՀ նախագահի հրամանագրով երեկ ազատվել էր ՀՀ ոստիկանության պետի տեղակալի պաշտոնից:

Այսօր yerkir.am-ի լրագրողը ՀՀ ոստիկանապետի մեկ այլ տեղակալից` Սամվել Հովհաննիսյանից, հետաքրքրվեց` իրենց գործընկերոջ` համակարգից հեռանալը չի՞ տխրեցրել նրանց: «Ես անձամբ տխրել եմ, քանի որ նա մեզ շատ հարազատ ընկեր էր, սակայն ուրախ եմ և վստահ, որ այն բարեփոխումները, որ Օսիկյանն իրականացրեց ոստիկանությունում, նույն տեմպով և ունակություններով կշարունակի այնտեղ»,- պատասխանեց փոխոստիկանապետը: Օսիկյանին մաղթելով բեղմնավոր աշխատանք` Հովհաննիսյանը նշեց, որ այժմ իրենց խնդիրը նրան արժանի փոխարինող ունենալն է:

Նշենք, որ այսօր «Հայկական ժամանակ» թերթը  գրել էր,  որ հնարավոր է`  Օսիկյանի փոխարեն ոստիկանության պետի նոր տեղակալ չնշանակվի, իսկ նրա գործառույթները ստանձնի Գագիկ Համբարձումյանը: Նա, բացի ոստիկանության պետի տեղակալ լինելուց, նաև քննչական վարչության պետն է, սակայն, ինչպես գիտենք քննչական վարչությունն ամբողջությամբ տեղափոխվում է Աղվան Հովսեփյանի ղեկավարած Քննչական պետական կոմիտե: Այսինքն` Համբարձումյանը ոստիկանությունում մնում է առանց ոլորտի:

Մանրամասները` yerkir.am-ի տեսանյութում: