Գյումրիին պե՞տք է արվեստների բուհ. հարցը մտահոգեց նաև Երևանի փոխքաղաքապետին

Տեղեկացրել էինք, որ այսօր Երևանի Կոմիտասի անվան պետական կոնսերվատորիայում ռեկտորի պաշտոնում վերընտրվեց բուհի ռեկտոր Շահեն Շահինյանը:

Խոսելով հետագա անելիքների մասին` նա նշեց, որ կոնսերվատորիայի Գյումրիի մասնաճյուղի կարգավիճակը պետք է փոխվի, այն պետք է դառնա առանձին բուհ: «Մենք այնտեղ 500 ուսանող ունենք, և սա քիչ թիվ չէ` նոր կրթական կառույց ունենալու համար: Բացի այդ` կարծում եմ` Գյումրին պետք է ունենա իր արվեստի բուհը` իր ուզած անունով»,- նշեց Շահինյանը:

Երևանի փոխքաղաքապետ Արամ Սուքիասյանին հարցը մտահոգիչ թվաց: «Չե՞ք կարծում, որ ձեր վերահսկողությունը դադարեցնելու և առանձին կարգավիճակ ունենալու դեպքում, այո, առաջին հայացքից Գյումրիի համար պատվաբեր կլինի, սակայն որակական առումով` գուցե ավելի խոցելի լինի այն, քանի որ մասնագիտացված բուհերի վերահսկողությունը լուրջ դերակատարում ունի»,- հարցրեց նա:

Կոնսերվատորիայի` Գյումրու մասնաճյուղի տնօրենը Կարինե Ավդալյանը պատասխանեց, որ ինքը դեմ չէ նման առաջարկին, չնայած պետք է նշել նաև, որ բուհի գրանցած հաջողությունների 99 տոկոսը մայր բուհի շնորհիվ է" «Թող կառավարությունը որոշի: Համենայն դեպս, որպես մասնաճյուղ, մենք մեզ լավ ենք զգում»,- հավելեց նա: