ՏԵՍԱՆՅՈՒԹ․ Ի՞նչ եղավ Երևանի տրանսպորտի բարեփոխումների ծրագիրը․ Թանդիլյանը՝ փոխքաղաքապետին

Երևանի քաղաքապետ Հայկ Մարությանը միակ պաշտոնյան է, որն արդեն երկրորդ անգամ չի գալիս բյուջետային քննարկումներին՝ ըստ Yerkir.am-ի նախ այս դիտարկումը հնչեցրեց ԱԺ Ֆինանսավարկային և բյուջետային հարցերի մշտական հանձնաժողովի նախագահ Մանե Թանդիլյանը` ԱԺ մշտական հանձնաժողովների համատեղ նիստում դիմելով Երևանի փոխքաղաքապետ Հրաչյա Սարգսյանին:

Փոխքաղաքապետն ասաց, որ Հայկ Մարությանը երկու վարակված քաղաքացիների կոնտակտավոր անձ է, այդ պատճառով է իր փոխարեն փոխքաղաքապետին ուղարկել։

Թանդիլյանը նկատեց, որ կոնտակտավոր լինելը վարակված լինելուց վատ չէ և եթե վարակված վարչապետը կարողացել է հեռավար մասնակցել, ապա այդ հնարավորությունը կարող էին ապահովել նաև քաղաքապետի համար։

Մանե Թանդիլյանի բուն հարցը Երևանի տրանսպորտի բարեփոխումների ծրագրին էր վերաբերում․ ի՞նչ փուլում է և ինչու է նշվում, որ չի իրականացվել, որովհետև չի իրականացվել։

Հրաչյա Սարգսյանն ասաց, որ ծրագիրը մեկնարկել է 2018 թ դեկտեմբերին և ընդհանուր բյուջեն 100 միլիոն եվրոյից անցնում է։

«Մինչ մենք որոշակի փոփոխություններ կիրականացնեինք, ուսումնասիրվում էր լրացուցիչ ներդրումային ֆոնդերի կամ վարկային միջոցների ներգրավումը, որովհետև 60-70 միլիոն սեփական մուտքեր ունեցող քաղաքի բյուջեով հնարավոր չէր իրականացնել 100 միլիոնանոց ծրագիր, ուստի այստեղ աշխատանքն իրականացնում են քաղաքապետարանը և կառավարությունը համատեղ»,-մանրամասնեց Երևանի փոխքաղաքապետը։

Նա ասաց, որ որպես ծրագրի մեկնարկային իրագործում 100 միավոր 12 մետրանոց ավտոբուսների գնման մրցույթ է հայտարարված, որով կունենաք Երևան մատակարարված առաջին խմբաքանակը, որպես շարժակազմի համալրման առաջին փուլ։

Մանե Թադիլյանը նկատեց, որ 2018-ի դեկտեմբերից մինչև այսօր միայն մեկ մրցույթ են հայտարարել, ուրիշ ոչինչ չեն արել։

Սարգսյանն ասաց, որ ֆինանսավորման աղբյուրների ուսումնասիրություն է կատարվել․ «Այս պահին ներդրումային կոմպոնենտ չի պարունակում, որ որևէ ներդրողի համար լինի հետաքրքիր, քանի որ ամբողջ աշխարհում տրասպորտային ցանցը վնասաբեր է և սուբսիդավորվում է կառավարության կողմից»։

Նա տեղեկացրեց նաև, որ այս պահին չկա որոշում՝ ծրագիրն արվում է ներդրումայի՞ն, վարկայի՞ն միջոցներով, թե՞ կառավարության ուղիղ սուբսիդավորմամբ։ Նշված 100 ավտոբուսը գնել են կառավարության տրամադրած միջոցներով՝ 10 միլիարդ դրամով։

«Հաջորդիվ մաս-մաս կներկրվեն մնացած խմբաքանակները, քանի որ մինչև ավտոբուսների ամբողջ քանակը՝ 840 միավորը չլինի, չենք կարող ծրագիրն իրականացնել, որովհետև դեռ 20 տոկոսով էլ ռեզերվային պարկ պետք է ձևավորվի»,-ասաց Հրաչյա Սարգսյանը։

Մանրամասն՝ տեսանյությում․