Եթե կուսակցությունը նման որոշում կայացնի, չեմ նեղանա. ՀՀԿ փոխնախագահ

Ազգային ժողովի պատգամավոր, ՀՀԿ փոխնախագահ Ռազմիկ Զոհրաբյանն այսօր խորհրդարանում լրագրողների հետ զրույցում անդրադարձավ մամուլում շրջանառվող լուրերին, թե կուսակցության առաջիկա համագումարում ՀՀԿ փոխնախագահի պաշտոնում իրեն փոխարինելու է ՀՀ վարչապետ Կարեն Կարապետյանը: Նա ընդգծեց, որ կուսակցության գործադիր մարմնի նիստերում այդ հարցը չի քննարկվել:

Հարցին` կուսակցության ղեկավար կազմում փոփոխությունների անհրաժեշտություն տեսնո՞ւմ է, Ռազմիկ Զոհրաբյանը պատասխանեց. «Ես այդ հարցին չեմ կարող պատասխանել, որովհետև նման քննարկում չի եղել: Երբ լինի նման քննարկում, ես կարծիքս կհայտնեմ»:

Անդրադառնալով Կարեն Կարապետյանի՝ ՀՀԿ-ին հնարավոր անդամակցությանը` նա ընդգծեց, որ այդ հարցը կքննարկվի, եթե Կարեն Կարապետյանը կուսակցությանն անդամագրվելու դիմում ներկայացնի, սակայն նման դիմում դեռ չկա:

Զոհրաբյանի խոսքով՝ նորություն չէ, որ Հայաստանի նոր կառավարության ղեկավարը ՀՀԿ-ի հետ կարող է համագործակցել: Պատգամավորը հիշեցրեց, որ Կարեն Կարապետյանը ՀՀԿ-ի ցուցակը գլխավորել է Երևանի ավագանու ընտրություններում և որոշ ժամանակ զբաղեցրել քաղաքապետի պաշտոնը:

Նա դժվարացավ պատասխանել հարցին՝ կլինի՞ հաջորդ խորհրդարանում, թե՞ ոչ, սակայն նշեց, որ կլինի հաջորդ խորհրդարանում, եթե կուսակցությունը նման որոշում կայացնի, իսկ եթե չլինի նման որոշում, ինքը չի նեղանա: