Վիգեն Սարգսյանն առաջարկեց թվարկել ՊՆ բյուջեի հաշվին իրենց ընտանիքների երջանկությունը կառուցողների անունները

ԱԺ հերթական քառօրյա նիստում քննարկվում է բանակում հատուցման համակարգն ապահովող հիմնադրամի ստեղծման հարցը՝ «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագիծը, որի մասին զեկուցեց պաշտպանության նախարար Վիգեն Սարգսյանը:

Հիշեցնենք, որ խոսքը մարտական գործողությունների ժամանակ զոհված զինծառայողների ընտանիքների և հաշմանդամ դարձած զինծառայողների հատուցման և ապահովագրության համար ստեղծվող հիմնադրամի մասին է, որի գումարները գոյանալու են` յուրաքանչյուր աշխատողից ամսական 1000 դրամ գանձելով:

Վիգեն Սարգսյանի խոսքով՝ կան վերանայման ենթակա հարցեր, օրինակ` այն, որ այն ընտանիքները, որոնք ունեն ժամկետային զինծառայողներ, չպետք է վճարեն այդ գումարը: Ըստ նախարարի` դա շատ տրամաբանական առաջարկ է, որով հենց ինքը հանդես կգա:

«Այս օրինագիծը սուր, հաճախ միմյանց վիրավորող արտահայտությունների տեղիք է տվել այս օրերին, սակայն այս օրենքի բովանդակությունը կարծես այն չէ, որ պիտակավորեն մեկը մյուսին: Միաժամանակ՝ առաջարկելով այս օրենքի նախագիծը, չէի կարող ունենալ միավորներ կուտակելու ձգտում, չեմ փնտրել սրա մեջ քաղաքական դիվիդենդներ, այլ ցանկանում ենք ունենալ մի հարցի պատասխան՝ հնարավո՞ր է նոր քաղաքականություն ներկայացնել այս հարցնում: Ունենք հայրենիքի համար զոհվածներ, հաշմանդամներ, եթե փորձեինք բյուջեի հաշվին անդրադարձ կատարել բոլորին, ապա կկատարեինք պոպուլիստական քայլ՝ ընդառաջ ԱԺ ընտրություններին, բայց բյուջեի գումարները դրա հնարավորությունը չեն տալիս: Ուզում եմ ազնիվ ասել, որ միայն ուրախ և կողմ կլինեմ, թե պատգամավորներից յուրաքանչյուրը և համապատասխան մարմինները անուն առ անուն թվարկեն նրանց, ովքեր փորձել են պաշտպանության բյուջեի հաշվին կառուցել իրենց ընտանիքների ենթադրյալ երջանկությունը: Խորապես վստահ եմ, որ դա անհնար է ոչ միայն իրավական, այլ բարոյական առումով»,- ասաց Վիգեն Սարգսյանը: