Սփյուռքի նախարարության անվանը «հայրենադարձություն» տերմինը չի ավելանա. կառավարությունը մերժեց Շարմազանովին

ԱԺ արտահերթ նիստում արդարադատության նախարար Արփինե Հովհաննիսյանը կառավարության կառուցվածքային փոփոխությունները երկրորդ ընթերցմամբ քննարկելու ժամանակ նշեց, որ կառավարությունը չի ընդունել ԱԺ փոխնախագահ Էդուարդ Շարմազանովի առաջարկությունը՝ Սփյուռքի նախարարությունը վերանվանել Սփյուռքի և հայրենադարձության նախարարություն:

Նախարարի խոսքով՝ առաջարկությունը քննարկման է դրվել, սակայն կառավարության դիրքորոշումն այն է, որ այս պահին նպատակահարմար չէ այդ առաջարկն ընդունել:

«Խնդիրը ոչ թե այդ առաջարկությունների հետ անհամաձայնությունն է, այլ ինստիտուցիոնալ առումով այս պահին կառավարության դիրքորոշումը, պատկերացումն անվանումների մասով այդպիսին է, որովհետև կա որոշակի տեսլական՝ ծրագրի հետ կապված: Եվ այդ առաջարկություններին հետագայում՝ ինստիտուցիոնալ վերանայումների շրջանակներում, անդրադարձ կկատարվի»,- ասաց Արփինե Հովհաննիսյանը: