Ոչ բոլորը կարող են ունենալ պաշտոնից հրաժարվելու ուժ. Վահրամ Բաղդասարյանը՝ Հովիկ Աբրահամյանի մասին

Այսօր լրագրողների հետ զրույցում ԱԺ ՀՀԿ խմբակցության ղեկավար Վահրամ Բաղդասարյանն անդրադարձավ վարչապետի հրաժարականին: Նրա համոզմամբ` դա Հովիկ Աբրահամյանի որոշումն է եղել, և ելույթում նա հստակ տվել է հրաժարականի պատճառներն ու մեկնաբանությունները, նշել, որ տնտեսության աճի այն տեմպերը, որոնք կան, իրեն չեն գոհացնում:

Վահրամ Բաղդասարյանի համոզմամբ՝ երկու տարվա ընթացքում Հովիկ Աբրահամյանը ոչինչ չի խնայել, աշխատել է բարեփոխումներ իրականացնել, մի մասը ստացվել է իրագործել, մի մասն էլ ընթացքի մեջ էր: Սակայն, ըստ նրա, աշխարհաքաղաքական, ռազմական մարտահրավերներն ու հասարակության բևեռացման խորացումը և բարեփոխումների տեմպերը չէին բավարարում Հովիկ Աբրահամյանին, ով իր մեջ ուժ գտավ հրաժարականի դիմում ներկայացնելու և նոր ձևավորվող կառավարությանը օժանդակելու համար: Հասարակությունը պահանջում էր փոփոխություններ և հապաղելու ժամանակ չկար:

«Ոչ բոլորի մոտ կա այդ ուժը՝ կամովին վարչապետի պաշտոնից հրաժարվելու: Պաշտոնից հրաժարվելը բացառապես Հովիկ Աբրահամյանի որոշումն է եղել, նա մտել է նախագահի մոտ այդ առաջարկությամբ: Ինձ համար նրա հրաժարականը անակնկալ էր»,- ասաց Վահրամ Բաղդասարյանը: