Վահրամ Բաղդասարյանի կարծիքով` Հովիկ Աբրահամյանի հեռանալը չի ազդի կուսակցության վարկանիշի վրա

Յուրաքանչյուր մարդ ինքն է որոշում` իր քաղաքական ուղին ոնց շարունակի. Yerkir.am-ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը` անդրադառնալով Հովիկ Աբրահամյանի` ՀՀԿ-ն լքելու որոշմանը:

«Նորմալ եմ համարում: Յուրաքանչյուրն ինքն է որոշում իր քաղաքական ճակատագիրը: Մենք ազատ, դեմոկրատական երկիր ենք, և յուրաքանչյուր ոք ունի իր` որոշում կայացնելու իրավունքը, թե ինչպես շարունակի իր քաղաքական ճանապարհը»,- ասաց ՀՀԿ-ականը:

Նրանից հետաքրքրվեցինք` արդյո՞ք անսպասելի էր նրա համար նախկին վարչապետ Հովիկ Աբրահամյանի դուրս գալը իրենց կուսակցությունից: Բաղդասարյանն արձագանքեց. «Բնականաբար, կար ինչ-որ անսպասելի բան»:

Անդրադառնալով շրջանառվող լուրերին, թե ՀՀԿ-ական պատգամավոր Մհեր Սեդրակյանն ու Սյունիքի նախկին մարզպետ Սուրիկ Խաչատրյանն էլ են պատրաստվում դուրս գալ կուսակցությունից, նա նշեց, որ դրանք միայն մամուլի հրապարակումներ են:

Ինչ վերաբերում է հարցին` արդյո՞ք Հովիկ Աբրահամյանի` ՀՀԿ-ն լքելու որոշումը կազդի կուսակցության վարկանիշի վրա, Բաղդասարյանը կարճ պատասխանեց. «Չեմ կարծում»:

Այլ հարցերի նա չցանկացավ պատասխանել` պատճառաբանելով, թե զբաղված է:  

Հիշեցնենք` նախկին վարչապետ Հովիկ Աբրահամյանը երեկ հայտարարել է, որ դուրս է գալիս ՀՀԿ-ից, սակայն շարունակելու է մնալ քաղաքականության մեջ: Մանրամասները նա կհայտնի այսօր:

Նշենք, որ լուրեր են տարածվել, որ Սյունիքի նախկին մարզպետ Սուրիկ Խաչատրյանն ու ԱԺ ՀՀԿ-ական պատգամավոր Մհեր Սեդրակյանը ևս պատրաստվում են լքել ՀՀԿ-ն և միանալ «Ծառուկյան դաշինք»-ին: