Զինվորների սեռաբջիջների պահպանման մասին նախագիծը հանվեց քննարկումից

Այսօր ԱԺ առողջապահության, մայրության հարցերի մշտական հանձնաժողովում քննարկվում էր «Ժառանգություն» խմբակցության պատգամավոր Թևան Պողոսյանի ներկայացրած օրինագիծը, որով առաջարկվում է լրացում կատարել «Մարդու վերարտադրողական առողջության և վերարտադրողական իրավունքների մասին» օրենքում հետևյալ նախադասությամբ. «Պետությունը երաշխավորում է 18 տարին լրացած պարտադիր զինվորական ծառայության զինակոչվող քաղաքացիների սեռաբջիջների պահպանությունը՝ այդ նպատակով ստեղծված համապատասխան սեռաբջիջների պահպանության բանկում»:

Հաշվի առնելով, որ զինվորական ծառայությունը լի է բազում անկանխատեսելի վտանգներով եւ ռիսկերով, ապա՝ զորակոչիկների հետագա վերարտադրողականությունն ու նրանց սերունդների շարունակականությունն ապահովելու նպատակով, սեռաբջիջների պահպանության բանկի ստեղծումը կունենա կարեւոր եւ էական նշանակություն: Թևան Պողոսյանը ներկայացրեց օրենքի նախագծի մշակման նախապատմությունը, որի հիմքում ընկած է եղել ապրիլյան պատերազմը, երբ անմահացան տասնյակ զինվորներ, որոնց մեծ մասը ընտանիքի միակ զավակն էին ու ընտանիքի միակ հույսը: Պատգամավորը նշեց, որ ուսումնասիրել է այն երկրների փորձը, որոնք գտնվում են պատերազմական համանման իրավիճակում` Իսրայելն ու ԱՄՆ-ը, և մշակել է այդ օրենքի նախագիծը: Ըստ հեղինակի` այն ժամանակ հայ հասարակության էմոցիոնալ դաշտը պատրաստ չէր այդ գաղափարն ընդունել, անգամ` սխալ ուղղությամբ գնացին քննարկումները: Մինչդեռ, հաշվի առնելով երկրի ժողովրդագրական ցուցանիշների անմխիթար վիճակը, երբ Հայաստանը համարվում է ծերացող երկիր, որտեղ եթե անգամ ընտանիքները երեք երեխա ունենան, պարզ վերարտադրողական ցուցանիշները չեն վերականգնվի, առաջարկվող նախագիծը ստանում է կարևորություն:

«Մեր երկրի դեմոգրաֆիական մարտահրավերները ոչ ոք չի լուծել, դրանք գնալով խորանում են: Այս գաղափարն առաջ տանելիս պատրաստ էի ստանալ հարվածներ: Իհարկե, մենք հիմա ավելի շատ ներքին միասնականություն ունենալու մարտահրավեր ունենք: Այս հարցը քննարկել եմ առողջապահության նախարարի հետ, ով նշեց, որ եթե լինեն զինվորներ, ովքեր կցանկանան սեռաբջիջները պահել, պետությունը կստանձնի այդ պարտավորությունը: Հիմա ես առաջարկում եմ հանել այս նախագիծը քննարկումից, դրան կանդրադառնանք տարիներ հետո»,- ասաց Թևան Պողոսյանը՝ հավելելով, որ գաղափարը քննարկել է նաև բիոէթիկայի խնդիրներով զբաղվող տարբեր իրավաբանական խմբերի հետ, որոնք առաջարկել են ժողովրդագրական խնդիրները լուծել բոլոր հնարավոր միջոցներով:

Պատգամավորը շեշտեց, որ խոսքը պարտադիր երևույթի մասին չէ, լինելու է կամավորության սկզբունքով: Նաև հավելեց` քանի այդ գաղափարը սուր ընդունվեց հասարակության կողմից, կաշխատեն ապագայում ավելի ճիշտ նախագիծ մշակել:

Հանձնաժողովի նախագահ` ՀՀԿ-ական Արա Բաբլոյանը շնորհակալություն հայտնեց պատգամավորին նման գաղափար ներկայացնելու համար և ասաց, որ եթե որոշում են նախագիծը հանել, ուրեմն պետք է նամակ գրել կառավարությանը, որ կառավարությունն ամեն դեպքում ուշադրություն սևեռի բարձրացվող հարցին: Նա նշեց, որ հարգում է այն պատգամավորներին, որոնք գալիս են կոնսենսուսի և ծանր չեն տանում այն, որ հարցը հանում են քննարկումից:

Քննարկմանը ներկա` առողջապահության փոխնախարար Սերգեյ Խաչատրյանը նշեց, որ առաջարկվող լրացումը պետք է լինի իրավունք, այլ ոչ` պարտականություն, քանի որ ամեն մարդ ինքն է որոշում իր վերարտադրողական ֆունկցիայի հարցը: Բաբլոյանը հավելեց, որ Թևան Պողոսյանը չի առաջարկում այն պարտադիր ամրագրել:

Որոշվեց հարցը հանել քննարկումից: