Ի՞նչ սպասել Սիրիայի հարցով` ԱՄՆ Կոնգրեսի քննարկումից

ԱՄՆ Կոնգրեսի անդամները տարակարծիք են Սիրիային հարված հասցնելու հարցում: Ըստ ամերիկյան ԶԼՄ-ների`ԱՄՆ նախագահ Բարաք Օբաման ակտիվորեն աշխատում է կոնգրեսականների հետ` փորձելով նրանց համոզել` թույլատրել Սիրիայի դեմ ռազմական գործողությունը. տեղեկացնում է Reuters-ը:

Սակայն որոշ կոնգրեսականներ ապացուցված չեն համարում քիմիական զենքի կիրառումը եւ կասկածներ են հայտնում ամերիկյան գործողության նշանակալի լինելու կապակցությամբ: Այսպես` Ներկայացուցիչների պալատի հետախուզության հարցերով հանձնաժողովի անդամ Ադամ Շիֆը նշել է. «Սպիտակ տան առաջարկած բանաձեւի նախագիծը շատ ընդլայնված է եւ դրանում չի հիշատակվում, թե երբ է ավարտվելու գործողությունը: Այն կարող է ծառայել` արդարացնելու համար ամեն ինչ` սահմանափակ հրթիռային հարվածներից մինչեւ Սիրիայի վրա անթռիչք գոտի ստեղծելն ու ամերիկյան զորքերի ցամաքային գործողությունը»:

Անգամ Դեմոկրատական կուսակցության ներկայացուցիչներն են կասկածում, որ ամերիկյան գործողությունը կլինի կարճաժամկետ ու արդյունավետ, ինչպես հավաստիացնում է իրենց կուսակից Օբաման: 70 րոպե տեւած հեռախոսային խորհրդակցության ժամանակ նրանք մտահոգություն են հայտնել, որ ԱՄՆ-ը կարող է ավելի շատ ներքաշվել հակամարտության մեջ:

Սակայն Օբաման ակտիվ կողմնակիցներ ունի հանրապետականների շրջանում, օրինակ` Ջոն Մակքեյնը եւ Լինդսի Գրեմը: Սենատոր Մակքեյնը լրագրողներին հայտարարել է, որ Կոնգրեսը չափազանց հստակ պետք է պատկերացնի, որ Սիրիայի վրա հարձակմանը դեմ քվեարկելը աղետալի հետեւանքներ կունենա: