ՀՀԿ-ն վերջնական որոշում չի կայացրել Գյումրիում. Սուքիաս Ավետիսյան

ՏԻՄ ընտրությունները հնարավորություն կտան խորհրդարանական ընտրություններին ընդառաջ նորաստեղծ կուսակցություններին քիչ թե շատ հայտնի դառնալ հասարակությանը: Այս մասին այսօր լրագրողների հետ հանդիպմանն ասաց ԱԺ ՀՀԿ խմբակցության պատգամավոր Սուքիաս Ավետիսյանը: Խոսելով Գյումրիում սպասվող քաղաքապետի ընտրություններից`Ավետիսյանը նշեց, որ վերջին քննարկումների արդյունքում Հայաստանի Քրիստոնեա-դեմոկրատական կուսակցության Շիրակի մարզային կառույցը դիմել է ՀՀԿ-ի մարզային կառույցին, որպեսզի ընտրություններին միասնական հանդես գան: «Մենք քննարկումներ իրականացրել ենք, տարածքային կառույցը տվել է իր դրական պատասխանը , տարածքային կառույցում որոշում են կայացրել, որ այդ դաշինքի առաջին համարը  լինի Սամվել Բալասանյանը` հիմնավորելով, որ Գյումրիում կան  կատարված և կատարվելիք աշխատանքներ ու որպեսզի  այդ աշխատանքները հնարավոր լինի տրամաբանական ավարտին  հասցնել,  ճիշտ է`  Սամվել  Բալասանյանը  շարունակի   աշխատանքները` որպես քաղաքապետ»,- ասաց Ավետիսյանը:

Yerkir.am-ի հարցին` կա՞ պաշտոնական որոշում, որ ՀՀԿ-ն սատարելու է Սամվել Բալասանյանին, Ավետիսյանը պատասխանեց. «Պաշտոնական որոշում չկա, եղել է Շիրակի մարզային կառույցի առաջարկությունը, իսկ  երբ գործադիր մարմինը կքննարկի և որոշում կկայացնի,  դա արդեն կլինի պաշտոնական»: Ավետիսյանը նաև նշեց, որ հայտնի չէ` երբ կկայացվի պաշտոնական որոշում:

Պատասխանելով հարցին` չի՞ կաշկանդում կամ մտածելու տեղիք չի՞ տալիս այն հանգամանքը, որ Սամվել Բալասանյանը  բազմաթիվ կուսակցություններ է փոխել, Ավետիսյանն արձագանքեց.  «Իմ սատարելը որևէ բանի հետ կապ չունի: Կոնկրետ ինձ համար կապ չունի` ով որ կուսակցությունից է և ինչ է արել: Սամվել Բալասանյանին ես ճանաչում եմ որպես Սամվել Բալասանյան, այլ  ոչ թե այս կամ այն կուսակցության անդամ: Սամվել Բալասանյանին ճանաչում եմ առնվազն 40 տարի, այնպես որ  դա որևիցե բան չի փոխում: Նա պարտավոր է իր գործը մինչև վերջ պատասխանատվությամբ կատարել` ի շահ գյումրեցիների»: