Չեմ հասկանում՝ Ավետիսյանների հարազատները ինչ են ուզում Կոստանյանից. Սուքիաս Ավետիսյան

Գյումրին ներկայացնող ՀՀԿ-ական պատգամավոր Սուքիաս Ավետիսյանը չգիտի Գևորգ Կոստանյանի նամակի բովանդակությունը և չգիտի` Չայկայից նա ինչ է ակնկալում: «Ինչպես նաև չեմ հասկանում՝ ի՞նչ են Ավետիսյանների հարազատները կամ մեր հասարակությունը ուզում Գևորգ Կոստանյանից»,- Yerkir.am-ի հետ զրույցում, խոսելով Ավետիսյանների հարազատների պահանջի մասին, ասաց պատգամավորը:

Դիտարկմանը, թե բնական է Ավետիսյանների՝ Վալերի Պերմյակովի հետագա ճակատագրով և դատավարության ընթացքով հետաքրքրվելը, նա արձագանքեց. «Գլխավոր դատախազն ինքն է, այո, բայց դեռ քննություն է ընթանում: Սա սովորական դեպք չէ: Անցել է ընդամենը 40 օր, բայց ուզում են ինչ-որ կոնկրետ բա՞ն իմանալ»:

«Ես Ավետիսյանների հարազատներին հանդիպել եմ քառասունքի արարողությանը և փորձել եմ հետաքրքրվել, թե ի՞նչ են պահանջում գլխավոր դատախազից: Իրենք պահանջում են գլխավոր դատախազին, բայց չեն ասում, թե ի՞նչ են պահանջում նրանից»,- նշեց պատգամավորը:

Սուքիաս Ավետիսյանը ասաց, որ իր համար անհասկանալի է նաեւ այն հանգամանքը, թե մեկ շաբաթ առաջ քննչական կոմիտեում գտնվելու ժամանակ Ավետիսյանների ընտանիքի հարազատները կոնկրետ ի՞նչ հարցադրումներով են հանդես եկել: