Ձմեռ պապն ամեն ինչ կարող է ներկրել. ՀՀԿ-ական Սուքիաս Ավետիսյան

Yerkir.am-ի հումորային հարցերին պատասխանում է ԱԺ ՀՀԿ խմբակցության պատգամավոր Սուքիաս Ավետիսյանը:

 -Եթե վաղ առավոտյան բոլորը խայտառակ եղածի պես ամաչում են, ուրեմն Նոր տարին ստացվե՞լ է:

-Նոր տարին ստացվել է և շատ լավ է ստացվել, շատ բուռն է եղել ամեն ինչ: Տոնել են իսկապես, էն որ ասում են` մինչև վերջ, և կարողացել են առօրյա հոգսերից ձերբազատվել:

- Ձմեռ պապն ինչո՞ւ է նախընտրում եղնիկներով երթևեկել, այլ ոչ թե`«Բենթլի»-ով:

-Էն ժամանակ, որ Ձմեռ պապիկը եղել է, էդ ժամանակ թանկարժեք մեքենաներ, «Բենթլի»-ներ չեն եղել, ամենամատչելի և ապահով տրանսպորտը եղնիկներն են եղել` սահնակներով: Ձմեռ պապը ձյուների մեջ է, և հիմա է միայն, որ ամենագնացներ կան և  կարող են ամեն տեղ երթևեկել:

- Ձմեռ պապից մանդա՞տ եք խնդրելու, թե՞ տնտեսական աճ:

- Ձմեռ պապիկից խնդրելու եմ խաղաղություն: Խաղաղությունից հետո մնացած ամեն ինչ կարելի է կամաց-կամաց ձեռք բերել: Մանդատն առաջնահերթություն չէ, ու չարժե Ձմեռ պապին նման խնդիրներով ծանրաբեռնել: Եկեք Ձմեռ պապիկին գոնե չքաղաքականացնենք:

- Ամանորի գիշերը երազանք կպահե՞ք, որ ինչ-որ ընդդիմադիր գործիչ այլևս խորհրդարանում չհայտնվի  2017-ի ընտրություններից հետո:

- Ձմեռ պապիկից` չէ, բայց մեր ժողովրդից կխնդրեմ, որ այն գործիչները, կապ չունի` ընդդիմադի՞ր, թե՞ ոչ, որոնք իրենց չեն կարող պահել խորհրդարանում, չարժե, որ գան խորհրդարան ու խորհրդարանի պատիվը գետնով տան:

- Վարչապետի հանձնարարականը` ով ինչ ուզի, այսուհետ կարող է ազատ ներկրել, կտարածվի՞ Ձմեռ պապի բերած նվերների վրա:

- Առավել ևս սահնակով ներկրումների հետ կապված խնդիրներ չպետք է լինեն: Ձմեռ պապն ամեն ինչ կարող է ներկրել, որովհետև  Ձմեռ պապն այդ ցուցակի մեջ չի մտնում, միշտ արտոնություն ունի և պետք է ունենա:

-Ո՞ր կենդանու հետ կասոցացնեք Նոր տարին:

- Նոր տարին մեծ մասը խոզի  հետ են ասոցացնում՝ անկախ տարվա կենդանակերպից:

-Քանի՞ բաժակ խմելուց  հետո եք մոռանում` ով եք, ում եք հյուր գնացել :

- Մշտապես ուզում եմ, բայց չեմ կարողանում այն վիճակի մեջ լինել, որ հաջորդ օրը վատ լինեմ: Չեմ  կարող հաշվել, չի հաշվվում ինձ մոտ, չի  ստացվում, ես ցանկություն ունեմ, բայց չի ստացվում, օրինակ, մոռանալ՝ ում եմ հյուր գնացել:

-Երազանքների Ձյունանուշը, ում կողքին Ձմեռ պապ կլինեիք:

- Ամենալավ Ձյունանուշն իմ կողքին է` իմ կինն է, եթե  չհամաձայնի, ապա աղջիկներիցս մեկը: Քաղաքական դաշտից ամենագեղեցիկ Ձյունանուշը կլիներ արդարադատության նախարարը:

-Տոներից հետո կշռվո՞ւմ եք:

- Ես ընդհանրապես փորձում եմ պահել իմ կազմվածքը, բայց Նոր տարվա սեղաններից չես կարող չգայթակղվել: Եթե գայթակղվում եմ, մի քանի օր փորձում եմ հակառակ պրոցեսն անել` հեռու մնալ սեղաններից և չնչին չափով ուտել: