Լուծարվում է Գյումրու տեխնոպարկի հին ՓԲԸ-ն, իսկ նորը գործում է. Սուքիաս Ավետիսյան

Մի փոքր թյուրիմացություն է եղել` լուծարվում է հին` «Գյումրու տեխնոպարկ» ՓԲԸ-ն: Այս մասին այսօր լրագրողների հետ զրույցում ասաց ԱԺ ՀՀԿ խմբակցության պատգամավոր Սուքիաս Ավետիսյանը:

Նա նշեց, որ նախկին ՓԲԸ-ի 49 տոկոսը պետական բաժնեմաս էր` Գյումրու անալիտիկ սարքերի գործարանի բաժնեմասերով, և քանի որ այդ գործարանն այլեւս չի գործում, որոշվել է լուծարել հին ՓԲԸ-ն:

«Առաջին անգամ տեխնոպարկը անալիտիկ սարքերի գործարանի տարածքում էր, հետո կառավարությունը նոր տարածք վերցրեց, որտեղ գումարներ ներդրվեցին, որպեսզի «Ձեռնարկությունների ինկուբատոր» հիմնադրամի միջոցներով կարողանան իրագործել»,- ասաց Սուքիաս Ավետիսյանը:

Նրա խոսքով` նախորդը ստեղծվել է 2006-ին, բայց ընդլայնվելու հնարավորություն չի ստեղծվել, ահա` ինչու նոր շենք կառուցեցին, նոր հիմնադրամ ստեղծվեց, այնպես որ` լուծարվում է նախորդ ՓԲԸ-ն, և տարբեր կազմակերպություններ կիրականացնեն նոր ՓԲԸ-ի հիման վրա տեխնոպարկի իրականացման գաղափարը: