Վիեննայում կատարվել են Սերժ Սարգսյանի երեք նախապայմաններից երկուսը. Արզումանյան

ՀՀ նախկին արտգործնախարար, ԱԺ պատգամավոր Ալեքսանդր Արզումանյանն այսօր խորհրդարանում լրագրողների հետ զրույցում անդրադարձավ Վիեննայում կայացած Սարգսյան-Ալիև հանդիպմանը: Արզումանյանի խոսքով`հանդիպման փաստը կարևոր է, նաև` եռանախագահների միահամուռ հայտարարությունը, որը բացառվում է ռազմական լուծումը, և որ կողմերը պետք է վերադառնան 1994-1995 թվականներին ստորագրված եռակողմ պայմանագրին` հրադադար հայտարարելու մասին:

«Նաև խոսվեց այն մասին, որ կողմերը համաձայնել են միջադեպերի հետաքննման մեխանիզմներ ներդնել, ինչի մասին Հայաստանը բազմիցս հայտարարել էր, բայց Ադրբեջանը հրաժարվում էր: Այդ առումով` կարելի է ասել, որ բավականին դրական է հնարավոր բանակցությունների վերսկսման համար: Սա հայկական կողմին տալիս է հնարավորություն` դադար վերցնելու և զբաղվելու բանակաշինարարությամբ, դասեր քաղելու այն բացթողումներից, որոնք մենք ունեցել ենք, հետաքննություններ անցկացնելու, պատժելու մեղավորներին, սպառազինությամբ զբաղվելու և մեր ներքաղաքական կյանքում կատարելու ռեալ ռեֆորմներ»,- ասաց Արզումանյանը` հավելելով, որ Հայաստանը պետք է շարունակի պատրաստ լինել ցանկացած ռազմական գործողությունների վերսկսման, բայց դրա հետ մեկտեղ չպետք է խուսափի բանակցային գործընթացի վերսկսումից:

«Փորձը ցույց է տալիս` չենք կարող վստահ լինել, որ Ադրբեջանը կհարգի իր առջև դրված պարտավորությունները, ինչպես չի հարգել 94 թվականին կնքված պայմանագիրը, բայց այս անգամ կա եռանախագահների միահամուռ մասնակցությունը, և կարծում եմ` եթե մեխանիզմները ներդրվեն, դա հնարավորություն կտա խոսելու նաև հասցեական խախտումների մասին»,- ասաց նա:

Արզումանյանի խոսքով` Վիեննայում կատարվել են Սերժ Սարգսյանի երեք նախապայմաններից երկուսը: «Նախապայմաններից երկուսը վերահաստատվել են, մի նախապայման չի արվել, որն ավելի շատ հռետորական էր և հասցեական հայտարությունների մասին էր: Հասցեական հայտարարությունը բացառված է, որ միջնորդներից որևէ մեկն անի, դա աքսիոմ է, իսկ մենք ավելի պետք է ակնկալենք հասցեական հայտարարություններ բարեկամ երկրների կողմից»,- ասաց նա:

Պատգամավորը նշեց նաև, որ մենք պետք է ունենանք ադեկվատ բանակ, որը պետք է պատասխանի և անհրաժեշտության դեպքում պատժի նախահարձակ կողմին ու չխուսափի բանակցություններից:

«Մենք շահագրգռված ենք խաղաղ կարգավորմամբ, մենք մեր հարցը ռազմի դաշտում արդեն լուծել ենք, մնում է դա բերել խաղաղության սեղանին, մնում է դա Ադրբեջանը հասկանա»,- ասաց նա` հավելելով. «Միջազգային հանրությունը երկու օր հետևում էր` ինչպես է Ադրբեջանը փորձում ռազմական ճանապարհով լուծել խնդիրը, ՌԴ նախագահ Պուտինը միայն ամսի չորսին է անդրադարձել: Այդ էր Ադրբեջանին տրված ժամկետը`փորձելու դաշտում իրավիճակ փոխել, ինչը Ադրբեջանին չհաջողվեց»: