Հիմա այդ պահը չէ. Սամվել Նիկոյանը՝ Արցախը ճանաչելու մասին

Այսօր լրագրողների հետ զրույցում ԱԺ ՀՀԿ խմբակցության պատգամավոր Սամվել Նիկոյանը, խոսելով Հայաստանի ու Արցախի համար ստեղծված ռազմաքաղաքական վիճակի մասին, նշեց, որ չի բացառվում ռազմական լայնածավալ գործողություն սահմանին:

«Մենք հասկացանք, որ ունենք ԶՈՒ, զինված բանակ, որը միշտ եղել է մեր ժողովրդի հոգածության առարկան, ունենք հերոս զինվորներ, սպաներ, որոնք ունակ են թշնամուն ցույց տալ իր տեղը: Մենք ունենք բավարար քանակի զինտեխնիկա, որ կարողանանք թշնամու ատամները ջարդել»,- ասաց Սամվել Նիկոյանը:

Ինչ վերաբերում է անվտանգության ու ինտեգրացիոն համակարգերին, պատգամավորը կարծում է, որ Հայաստանը ճիշտ է վարվել՝ անդամակցելով ՀԱՊԿ-ին ու ԵՏՄ-ին, թեև կան խնդիրներ, բայց այդ ոլորտներում համագործակցությունը տվել է իր արդյունքները, Հայաստանը կարողացել է ձեռք բերել բավարար քանակի զինտեխնիկա:

Նրա խոսքով՝ եթե ընթանում են ռազմական գործողություններ, անիմաստ է խոսել բանակցությունների մասին: ԼՂ ճանաչման հետ կապված` Սամվել Նիկոյանը նշեց, որ ամեն ինչ պետք է արվի իր ժամանակին, համապատասխան պայմաններում, և այս պահին իշխանությունները գտնում են, որ սա այն պահը չէ, որ ԼՂ-ն ճանաչվի, թեև դա մեր նպատակներից մեկն է:

Հարցին, թե ի՞նչն է խանգարում, որ ԼՂ-ն այս պահին ճանաչվի, պատգամավորը նշեց, որ բանակցությունները պետք է շարունակվեն ՄԽ շրջանակներում: «Ադրբեջանի կողմից հաջորդ ռազմական գործողությունը հենց կլինի, այդ ժամանակ մենք կճանաչենք ԼՂ-ն»,- ասաց Նիկոյանը: